Naalakkersuisut siulittaasussaattut toqqarneqarnini tupigusuutigisimavaa
Eva Aariak-p taarserpaa Paul Okalik ukiuni qulingiluani naalakkersuisut siulittaasuattut inissisimasimasoq.
Nunavummi ukioq manna pisussat Aariak-p pissangartuutippai. Nunavut ukiut qulit matuma siornatigut namminersornerulerpoq, taannalu soorunami nalliuttorsiutigineqassalluni.
Nunavummi naalakkersuisut innuttaasunut sullissilluarnerunissaat Eva Aariak-p anguniarusuppaa, Nunavullu akisussaaffinnik amerlanerusunik tigusisinnaanissaa pillugu Canadami naalakkersuisut isumaqatigiinniarfigineqarnissaat sulissutigineqassaaq, aningaasanillu amerlanernik Nunavummut illikartitsisoqarnissaa anguniagassatut oqaatigaa.
Akissaatillit akissaatikinnerillu akornanni assigiinnginnerujussuaq iliuuseqarfigineqartariaqartoq Eva Aariak-p aamma oqaatigaa.
Nunavummi innuttaasut 75 procentii ilinniagaqarsimasuunngillat tamannalu pissutigalugu aningaasarsiorneq ajornakusoorsinnaalluni, tamaammat amerlanerusut ilinniagaqarnissaat aamma sulissutiginiarneqarpoq.