Naalakkersuisut siulittaasuat ataatsimeersuaqataasoq
- Issittumi najugaqartut nipaat - nunat inoqqaavisa naalakkersuinikkut nipaat - Issittoq pillugu oqallinnermi tusaaniassallugit pingaaruteqarput. Aammattaaq isumaqarpunga Issittoq pillugu nunarsuarmiut politikkerisaat uagut isumatsinnut tulluartumik ilusilersorneqartariaqartoq, Aleqa Hammond oqarpoq.
Aleqa Hammondip Danmarkimit avissaarnissamik pimoorussilluni sulissuteqarnini aamma isertuutinngilaa. Tamatuma angunissaanut sakkussat ilagissavaat Nunatta nunat tamalaat akornanni sapinngisamik sutigut tamatigut saqqumilaartinnissaa.
- Issittoq nunat tamalaat akornanni sammineqartupilussuuvoq. Issittoq nunat akornanni naalakkersuinikkut pingaarutilimmik inissisimavoq, aamma uagut nunat tamalaat akornanni politikkerisarput Issittumi Issittullu avataani suleqatigisatsinnit qanittumik malittarineqarpoq, Hammond oqarpoq.
Ataatsimeersuarneq Arctic Frontiers arfineq-pingajussaanik ingerlanneqarpoq, nunarsuarmioqatigiillu Issittumik pingaartitsinerulersimanerat aaqqissuisut maluginiarsimavaat. Ataatsimeersuarneq 2007-mi aallarteqqaarmat peqataaffigineqarpiarsimanani ukiormanna peqataasorpassuaqarpoq.
Ataatsimeersuarnermi qulequtarineqartoq - Issittup Inui - soqutigineqarluarpoq, peqataasullu nunanit 25-neersut 1000-init ikinnerunngitsut Tromsømi Ilisimatusarfimmut katersuussimapput politikerit ilisimatuullu Issittumi ineriartortitsinermik eqqartuinerat malittariniarlugu.
Aleqa Hammondip saniatigut aamma Norgemiut ministeriunerat, Erna Solberg, nunani avannarlerni politikerit arlallit, suliffeqarfinneersut, nunat tamalaat aallartitaat ilisimatuullu ataatsimeersuarnermut peqataapput.
