Naalakkersuisut sept. 26-ni nassuiaateqassapput

Nuna Advokatit ilassinninnermut aningaasartuutaasarsimasut misissoreeraallu, Naalakkersuisut marluk sapaatit akuneri pingasut qaangiutsinnagit nassuiaateqassasut aalajangerneqarpoq. Nassuiaateqartussallu qaqugorpiaq nassuaateqarnissartik nalornissutigereeraat, nassuiaaffissap ullua aalajangerneqarpoq.

Jens Napaattooq aamma nalornivoq, allakkalli Septembarip aappaani tiguneri malissagunigit, kingusinnerpaamik tallimanngorpat tulliani nassuiaateqarnissani naatsorsuutigivaa.

Ilassinninnermut aningaasartuutit Nuna Advokatit naliliinerat malillugu, Jens Napaattuup uterteqqitassai katillugit 473.000 kr.-put, misissuilluarnerilli takutikkumaarpaa, ilumut aningaasat taamak amerlatigisut uterteqqinneqassanersut.

Rasmus Frederiksen-ip nassuiaateqarnissaa sapaatiuppat tulliani pissagunarpoq, taasuma allakkat Septembarip sisamaani tigusimavai. Rasmus Frederiksen-ip aningaasat qanoq atorneqarsimanersut nassuiartussaavai, nalornissutigivaali qaqugorpiaq taanna pissanersoq.

Nuna Advokatit misissuinerat malillugu, Rasmus Frederiksen aningaasat 80.000 koruunit ilassinninnermut aningaasartuutitut eqqunngitsumik atorsimavai, uterteqqittussaallugillu.

Naalakkersuisut allattoqarfiani pisortaq Jørn Birk Olsen oqarpoq, allakkanik tigusisimaneq qaqugorpiaq pisimanersoq apeqqutaassasoq, Nassuiaanissamullu ulloq killeritinneqarpoq Atasinngornermi septembarip 26-at.