Naalakkersuisut sakkortuumik eqqornerlunneqarput

Inuit Nunatsinni timmisartumik angalaniartut, siorna innermik anitsisartup arsakoorneranit akornusersorneqaramilli, aatsaat taama eqqornerlunneqaruttorneranni, Nunatsinni pingaaruteqarnerpaanik aalajangiisartut sumiiffinnut assigiinngitsunut siaruarsimapput.

Naalakkersuisunut ilaasortat arlallit, qanoq ilillutik Nuummukarsinnaassanerlutik suli naluaat.

Namminersorlutik Oqartussat nalunaarutaat naapertorlugu taakkununnga ilaavoq, Inuussutissarsiornermut Aatsitassaqarnermullu Naalakkersuisoq, Ove Karl Berthelsen, pilersaarutit naapertorlugit sapaatip akunnera naatinnagu Nuummut utertussaagaluartoq.

Taassuma qanoq ililluni angerlarsinnaanissani nalugallarpaa.

Kulturimut, Ilinniartitaanermut, Ilisimatusarnermut Ilageeqarnermullu Naalakkersuisoq atorfimminut atatillugu maanna Danmarkimi angalavoq. Mimi Karlsenilu naalakkersuisooqatimisut Ove Karl Berthelsenitut sapaatip akunnerata naanerani utertussaagaluarluni, angalaniarneq ajornartorsiuteqarfigineqaannarpat ataasinngorpat Air Icelandimut ilaalluni Nuummukarnissani naatsorsuutigaa.

Naalakkersuisut siulittaasuat, Kuupik Kleist maannakut Norgemiippoq, sivikitsumillu sulinngiffeqariarluni atorfimminullu atatillugu angalariarluni, qaammatip naalernerani Nuummut uternissaa naatsorsuutigineqarpoq.

Ilaqutariinnermut Naalakkersuisoq, Maliina Abelsen København-imiippoq, januaarillu 24-anni angerlarnissani pilersaarutigalugu.

Aalisarnermut Piniarnermullu Naalakkersuisoq, Ane Hansen, Peqqinnissaqarnermut Naalakkersuisoq, Agathe Fontain, Nunamut Namminermut Naalakkersuisoq, Anthon Frederiksen, kiisalu Attaveqarnermut Ineqarnermullu Naalakkersuisoq, Jens B. Frederiksen, tamarmik Nuummiipput.

Namminersorlutik Oqartussanit paasissutissiinerit naapertorlugit, Palle Christiansen ullumi ualigaa Nuummut tikissimasussaavoq.