Naalakkersuisut qilaatersortarneq nunarsuarmiunut kingornutassanngortinniaraat

Qilaatersortarnerup UNESCO-p kulturikkut kingornussanut tigussaanngitsunut allattorsimaffiannut ilanngunneqarnissaa pillugu Nunarput Danmarkimi kultureqarnermut ministereqarfimmut qinnuteqaammik qanittumi nassiussissaaq.
Assi © : Camilla Dam/KNR
Allattoq Kathrine Kruse
septembarip 25-at 2018 15:23

Qinnuteqaat Issittumi Inuit tamaasa sinnerlugit nassiunneqassaaq, Canada aamma USA Unescomi kulturikkut kingornussanut tigussaanngitsunut isumaqatigiissummut suli akuunngimmata.

Naalakkersuisut septembarip qiteqqunnerata missaani aalajangerput Kultureqarnermut Naalakkersuisoq pisinnaatissallugu qilaatersortarnerup UNESCO-p kulturikkut kingornussanut tigussaanngitsunut allattorsimaffiannut ilanngunneqarnissaa pillugu Danmarkimi kultureqarnermut ministereqarfimmut qinnuteqaammik nassiussisinnaaneranut.

Nutaarsiassarlu tamanna qilaatersortartumit nuannaarutigineqarpoq.

- Tassuuna Naalakkersuisuininngaanniit timitalerlugu taperserneqalermat qamuuna assut nuannaarutigivara, Peter Steffani oqarpoq.

AAMMA ATUARUK Inatsisartut åbnet med trommedans og stilhed

Nunatsinnimi qilaatersortartut ukiut qulit matuma siornata missaani katerinnerminni qilaatersortarnerup siammarterneqarnissaa anguniarniarlugu aalajangersimapput.

- Taamaattumik taamatut siunnersuuteqarniarneq uanga tunginninngaanniit assut tapersersornarpoq. Kingulissagut, massakkut piffiit ajornakusoortorpassuit ornitassagut assigiinngitsut, nukissanik aallerfiusinnaasut tamaasa aallerfigisariaqaratsigit, Peter Steffani oqarpoq.

Nunatta Katersugaasivia Nuummiittoq Naalakkersuisunut innersuussuteqartuusimavoq qilaatersortarnerup UNESCO-p kulturikkut kingornussanut tigussaanngitsunut allattorsimaffiannut ilanngunneqarnissaanut.

Tamaanngaanniit qinnuteqaat isumalluarfigineqarpoq, Nunattami Issittumi inuit tamaasa sinnerlugit qinnuteqaat nassiunniarmagu.

- Canada aamma USA UNESCO-mi kulturikkut kingornussanut tigussaanngitsunut isumaqatigiissummi akuunngimmata Issittumi inuit tamaasa sinnerlugit qinnuteqarpugut, Kirstine Møller, kulturikkut kingornussat tigussaanngitsut pillugit Nunatta Katersugaasiviani katersugaasivilerisoq oqarpoq.

AAMMA ATUARUK Skuespillerelever lærer trommedans

Qilaatersortarnerup UNESCO-p kulturikkut kingornussanut tigussaanngitsunut allattorsimaffiannut ilanngunneqarnissaanut qinnuteqaat 2020-mi decembarimi akissuteqarfigineqassasoq naatsorsuutigineqarpoq.

Assersuutitullu taaneqarsinnaavoq yogartarneq UNESCO-p kulturikkut kingornussanut tigussaanngitsunut allattorsimaffiannut Indiamit 2016-imi ilanngunneqarmat.