Assi: KNR // Anton Gundersen Lihn

Inatsisartut ataatsimiinnerat qilaatersornermit nipangersimanermillu ammarneqartoq

Inatsisartut ukiakkut ataatsimiinnerat qilaatersornerminik eqqaaniaanermillu aallarnerneqariarluni Naalakkersuisut siulittaasuat ataatsimiinnerup ammarnerani oqalugiarpoq.

Inatsisartut ukiakkut ataatsimiinnerata aallartilluannginnerani qilaatersortoqarpoq, Inatsisartullu Nuugaatsiami Illorsuarmilu ajunaarnersuaqarnera eqqaaniarlugu minutsi ataaseq nipangersimapput.

Taamaattoqareernerani Inatsisartut siulittaasussaannik qinersisoqarpoq.

Siumumeersorlu Lars-Emil Johansen siulittaasutut qinerneqaqqippoq, Inuit Ataqatigiinneersullu Ane Hansenip Inatsisartunit sulinngiffeqarnera pissutigalugu siulittaasup tuliatut tunuarmat, Inuit Ataqatigiinneersoq, Mimi Karlsen Inatsisartut siulittaasuata tulliatut qinerneqarpoq.

Naalakkersuisut siulittaasuata Kim Kielsenip ataatsimiinnermik ammaassinermi oqalugiaataani ataatsimoornissamik kaammattuivoq.

Allarpassuarnilli aamma oqaaseqarpoq, ilaatigut Qeqertarsuup Tunuani qaleralinniarnerup ajornartorsiuteqarnera pissutigalugu Qeqertarsuup Tunuani qaleralinniarnerup  aqunneqarnerata allanngortinnissaa Naalakkersuisut siunnersuutigigaat, Kim Kielsen oqalugiarnermini oqarpoq.

- Aalisarnerup aalisagaqassutsillu taama annertutigisumik Qeqertarsuup Tunuani allannguuteqarnerata kingorna Naalakkersuisuni pisussaaffigaarput aalisartitsivimmi tassani aalisarnerlu ataatsimut isigalugu nutaamik aqutseriaaseqarnissamik isumaliuteqarnissatsinnut, Kim Kielsen oqalugiarnermini oqarpoq.

Aningaasarsiornerup ukiuni kingullerni siuarnera Kim Kielsenip aamma eqqaavaa. Taakkuli siunissamut atorneqassasut, maannakkullu ingerlatsinermik kivitsinermut atorneqassanngitsut, Kim Kielsenip erseqqissaatigaa.

Meeqqat atuarfiannit ingerlaqqittartut ikippallaartut Kim Kielsenip ilinniartitaaneq pillugu oqaaseqarnermini oqaatigaa. Tamannalu allanngortinniarlugu ukiuni aqqaneq-marlunni atuarnermik toqqammaveqartillugu kalaallit atuarfiannik ilinniartitaanikkullu ingerlatsineq ataqatigiissuussasoq naalakkersuisut kissaaatigigaat, Kim Kielsenip aamma oqaatigaa.

- Siunertaavoq inuusuttut suli amerlanerit ilinniarnertuunngorniarnermut inuussutissarsiutitaarniarluniluunniit ilinniarnermut ingerlaqqittassasut. Taamaattumik suleqatigiissitamik pilersitsisoqarpoq, 2019-imi atuarfeqarnikkut ilinniartutaanikkullu iluarsaaqqinnissamut inassuteaasiortussamik, Kim Kielsen oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl