Naalakkersuisut Qaanaami kommunalbestyrelsi ataatsimeeqatigaat
Naalakkersuisut Qaanaamut ulluni sisamani tikeraarnertik naggaserlugu Qaanaami kommunalbestyrelse ippassaq ataatsimeeqatigaat, siunissami piaartumik suliassat suleqatigiilluni aallartinneqartussat tassani isumaqatigiinniutigineqarlutik.
Namminersornerullutik Oqartussat Qaanaallu kommuneata suleqatigiillutik innuttaasut peqqissusaannut tunngatillugu suliassaat Peqqissutsimut Naalakkersuisup Arkalo Abelsenip nassuiaateqarfigai:
- Oqaloqatigiinnitsinni assigiinngitsut oqaloqatigiissutigisimasagut, aammalu innuttaasut ataatsimiitinnerini oqaloqatigisimasagut aallaavigalugit, Qaanaami kommunalbestyrelsi kissaatigisaminik uatsinnut saqqummiussivoq assigiinngitsunik, Qaanaami ilaanissarput kissaatigineqarnersoq. Tassalu taakkua oqaloqatigiissutigalugit tunngavilersorlugit ingerlappavut, taavalu piffissami qaninnerpaami nammineq kommunimi ataatsimiititaliamik suligasuartussamik pilersitassatsinnut ilaasortassanik toqqaassapput, uagullu siunnersuutigivarput borgmesteri ilaasariaqartoq, soorlu atuarfiup pisortaa, immaqa inunnik isumaginnittoqarfimmi siulittaasoq, kisianni namminneerlutik aalajangissavaat. Inuit tallimat toqqassavaat, piffissami qaninnerpaami Nuummukassapput taavalu suliassat sukuminerusumik tassani isumaqatigiissutiginiartussaassavagut.
