Qaanaami ilaqutariit atugaasa malunnaatilimmik pitsanngortinnissaat pisariaqarmat, imissanik 2,25 procentimit kimittunerusunik nioqquteqarneq sassaalliuteqarnerlu matusigallarlutik, Inuussutissarsiornermut, Suliffeqarnermut Inuussutissarsiutinullu Ilinniartitaanermut Naalakkersuisoq Siverth K. Heilmann oqarpoq.
- Naalakkersuisut aalajangereermata pisussaaffilerneqaratta kommunalbestyrelse ilisimatittariaqaripput, naalakkersuisuni ilaasortat arlaliulluta ilisimatitsisimavugut, taannalu soorunami tusaatissatut tiguneqartoq maluginiarparput, Siverth K. Heilmann oqarpoq, nangillunilu.
-Kisianni ilisimatillutigit naalakkersuisuni ilaasortat Peqqissutsimut Avatangiisinullu Naalakkersuisoq Aqqalo Abelsen, Ilaqutariinnermut Inatsisinillu Atortitsinermut Naalakkersuisoq Aleqa Hammond taavalu Naalakkersuisut Siulittaasuat Hans Enoksen qanittukkut Qaanaaliassasut.
Qaanaami pissutsit assigiinngitsut pillugit oqaloqatigiissutigineqassapput komitémillu pilersitsinissamik siunnerfiit eqqartorneqassallutik.
Iliuuserineqarsinnaasut imigassamut tunngasuinnaanngitsut kisianni aamma inuussutissarsiuutinut meeqqanullu tunngassuteqartut iliuuseqarfiginiarlugit naalakkersuisunit aalajangertoqarpoq, oqarpoq.
Aperaarput sooq imigassamik killilersuisoqalernersoq, tassami misilittakkat takutittareerpaat, imigassap ammaqqinneratigut ilaanni sakkortunerusumik imertoqalersartoq.
- Politiiusimasut naammattoortareerparput, kisianni iluamik aaqqissuussigaanni kommuni pineqartoq pillugu naalakkersuisut pisortaqarfiillu assigiinngitsut soornami politiit allallu susassaqartut peqatigalugit iliuusaasinnaasut iluatsissinnaasarput. Qularutiginngilaralu suliniut ajunnginnerpaamik siunnerfilimmik iluatsikkumaartoq, Siverth K. Heilmann naggasiivoq.
