Naalakkersuisut portomik tapiisarneq eqqarsaatigeqqinniaraat
Naalakkersuisut siulittaasuata Hans Enoksen-ip Sermitsiami Atuagagdliutinilu aaqqissuisuunerit ataatsimeeqatigereerlugit aviisit nuna tamakkerlugu saqqummersartut assartornermut aningaasartuutaannut tapiissutit
annikillisinneqarnissaanik aalajangerneq naalakkersuisooqatinilu eqqarsaatigeqqissallugu neriorsuutigaa. Taama allappoq Sermitsiaq.gl.
-Hans Enoksen-ip naqissuserpaa kiffaanngissuseqartumik isornartorsiuisumillu tusagassiuteqarnissaa tapersersorini, isumaqataavorlu kiffaanngissuseqartumik tusagassiuteqarneq inuiaqatigiinnut ineriartuutaasartoq. Taamaammallu naalakkersuisooqatiminut Inuit Ataqatigiinnut Atassutikkunnullu taanna qaqinniaraa, Sermitsiami aaqqissuisuuneq Poul Krarup oqarpoq.
Hans Enoksen-ip Sermitsiamut ilanngullugu nalunaarutigisimavaa aningaasaqarnermut kulturimullu ataatsimiititaliat portomik tapiisarnermut isumaqatigiinngitsut. Aningaasaqarnermut ataatsimiititaliap tapiisarneq akerlerivaa, kulturimulli ataatsimiititaliap aviisit portomik tamakkiisumik taperneqartarnissaat isumaqarfigalugu. Portomik tapiisarneq ullumikkut 50 procentiuvoq.
Aaqqissuisuunerup Poul Krarup-ip nalilerpaa, portomik tapiisarnerup peerneratigut atuartartunut 2,5 millioni koruunit tungaanut naleqassasoq.
Politikerit portomik sipaarniarnertik tunngaveqartippaat aningaasanut inatsimmi tapiissutit arlallit peerniaramikkit.
