Naalakkersuisut: Pisortat aningaasartuuteqarpallaarnerat ernumanarpoq
Kalaallit Nunaanni aningaasarsiorneq pillugu ministeriunermut siunnersuisartut nalunaarusiamminni ingerlatsinermut aningaasartuutit amerlavallaarnerussuannik uparuaanerat pillugu Aleqa Hammond ima oqarpoq.
Namminersornerullutik Oqartussat kommuunillu ingerlatsinermut aningaasartuutaat isertitanit annertunerujussuunerat upernaaq inatsisartut ataatsimiinneranni Aleqa Hammondip immikkut erseqqissaassutigaa maluginiaqqullugulu.
“Tamanna eqqummaariffigineqartariaqarpoq ineriartorneq taamaattoq nammanneqarsinnaanngilaq”, Aleqa Hammond oqarpoq.
Ilinniartitaaneq, meeqqanik inuusuttuaqqanik ilaqutarinnik peqqissutsimut inissaqarniarnikkullu naalakkersuisut immikkut aningaasaliinikuupput, ukiunut allanut naleqqiullugu annertunerussuarmik, Aleqa Hammond oqarpoq, tamannalu aningaasartuuteqarnerujussuarmut malunniuteqarpoq.
Kalaallit Nunaanni aningaasarsiorneq pillugu ministeriunermut siunnersuisartut Kalaallit Nunaanni pisortat ingerlatsinermi anigaasartuuteqarpallaarnerarlugit erseqqissaarnerat aningaasaqarnermut naalakkersuisup Aleqa Hammondip uppernarsarpaa, tamannalu upernaakkut inatsisartut ataatsimiinneranni erseqqissarpaa ernumarnarnerarlugulu.
Aatsitassatigut isertitsissutaajumaartussat suli isaatitsiffiunngimmata, aningaasat atugassat tunuarsimaaffigineqarnissaat Aleqa Hammond erseqqissarpaa.
