Naalakkersuisut pisassiissutinik atorunnaarsitsinissaq itigartitsissutigaat

Inuussutissarsiutigalugu piniartut qilalukkat qernertat, qilalukkat qaqortat nannullu decembarimi januaarimilu pisaat pisassiissutaasunut naatsorsorneqartarunnaassasut, Karl Kristian Krusep siunnersuutigaa.

Siunnersuummi allami Jens Napaattuup Ittoqqortoormiit Avanersuullu eqqaanni aarrinik, nannunik qilalukkanillu qinertanik qaqortanillu pisassiissuteqartarnerup atorunnaarsinneqarnissaanik misissuisitsinissaq ujartorpaa.

Siunnersuutilli tamarmik Naalakkersuisunit itigartitsissutigineqarput. Pisassiissuteqarunnaarnissarlu akisussaaffeqannginnerussasoq oqaatigineqarluni.

Aalisarnermut, piniarnermut nunalerinermullu Naalakkersuisoq, Nikkulaat Jeresmiassen akissuteqaateqarluni ima allappoq:

- Imarmiunik miluumasunik piniarneq piujuaannartitsinermik aallaaveqassaaq, ilaatigut piniagassat illersorneqarnernissaat pissutigalugu, ilaatigullu aamma piniartut siunissami inuussutissaanik isertitaqassutissaannillu qulakkeerinissaq anguniarlugu, naggataatigullu Kalaallit Nunatta arfanniartartutut nannunniartartutullu tatiginassuserput illersorniarlugu.

Pisassiissutinik atorunnaarsitsineq nungutitsinermik kinguneqarsinnaasoq

Jeremiassenip piniagassani assigiinngitsuni pitsaanngitsumik ineriartorneq pisassiissoqartalerneratigut ilorraap tungaanut ingerlasoqalersimasoq erseqqissaatigaa.

Pisassiisarnerup tamaanik ilaanilluunniit atorunnaarsitsineq piniagassat ikilinerannik sumiiffimmiluunniit nungutinneqarnerannik kinguneqarsinnaasoq, Nikkulaat Jeremiassenip nalilerpaa:

- Taamatullu iliuuseqarneq maannakkut siunissamilu kinguaariit atuisinnaanerat killilersorsinnaallugu, Jeremiassen allappoq.

Naalakkersuisut piniagassanut arlalinnut pisassiissutit siorna atorluarneqarsimannginnerat erseqqissaatigaat, piniartullu sumiiffimmi tassani isertitassaqarfinnik arlalinnik atorluarnerusinnaasaminnik peqaraluarnerarlugit.

Pilersaarutit malillugit siunnersuutit taakku marluk Inatsisartuni apriilip aqqarnani suliarineqassapput.