Naalakkersuisut Pinngortitaleriffik tusaajumanngilaat

Meqqit taateraallu ukiuunerani piniarneqarnerusalernissaat Naalakkersuisut namminneerlutik aasaq mannamiilli inassutigaat.

Piffissaq kingullerpaaq atorlugu politikkikkut aalajangertoqarpoq, tassalu februaarip ulluisa 29-anni. Allannguinikkut naalakkersuisut Pinngortitaleriffik tusaajumanngilaat. Mianersornissaq pissutigalugu uumasunik ilisimatuut taateraat piniarneqarnerulernissaat kissaatiginngilaat, Sermitsiami taama allaaserinnittoqarpoq.

Malittarisassat nutaat Kujataani Avannaanilu atuuttussat sunngiffimmi inuussutissarsiutigalugulu aallaaniartartunut tunngasuupput. Timmissanillu soqutigisallit peqatigiiffiat, Timmiaq, isumaqarpoq, politikerit Avannaani timmiarniartartut ikiorserumallugit taamatut aalajangersimasut.

-Piniartut iluaquserniartuusaarlugit, massakkulli kikkulluunniit timmissanik amerlanerusunik pisaqarsinnaanngorput. Tamanna allanngortiterisaqattaarluni aaqqissuussineruvoq, timmissanik ilisimatooq, Frank Wille, Timmiaq-meersoq, oqarpoq.

Taamaaliorneq mianersornissamut nungutsaaliuinermullu, Inatsisartut avatangiisinut eqqissisimatitsisarnermullu ataatsimiititaliaata aalajangiusimaniagaanut naapertuuttuunnginnerarpaa, kisianni Piniarnermut Aalisarnermullu Naalakkersuisup, Finn Karlsenip, Atassummeersup, taamaatoqannginnerarpaa.

-Timmissanik ilisimatuut allatut oqalukkaluarpataluunniit takusinnaavarput miteqarnerujussuanngorsimasoq, Finn Karlsen Sermitsiamut oqarpoq.