Naalakkersuisut paasissutissiinissamut piareersarput

Branding Greenland, tassa nunatta nunani tamalaani takoqqusaartarfia, nunanut allanut pisortaqarfimmiit inuutissarsiornermut naalakkersuisoqarfimmut ukiortaamiit nuunniarneqarpoq. Inuutissarsiornermullu naalakkersuisup puisit amii pillugit paasissutissiinerit ingerlanneqarnissaannut atuisoqartariaqarsoraa.

Aningaasat qanoq atorneqarnissaannut Inuutissarsiornermut naalakkersuisoq kisimi oqartussaanngikkaluarluni ima aaqqeerusunnerarpoq:

- Puisit amiinik siunertalimmik arlaatigut akuutinniarneqarsinnaanera pillugu aalajangiisoqarsinnaanera soorunalimi mattusimaneqanngilaq aamma tikinneqarsinnaasutut isigivara, Ove Karl Berthelsen oqarpoq.

Sooq Kalaallit Nunaanni pisortat peqataaffigisaannik puisit amii pillugit paasissutissiinissamik suliaqartoqannginnera atisat nutaaliat pillugit aviisimi Børsenimi allaaserinittartup tupigusuutigaa.

- Nunap immikkoortuani ineriartortitsinermut tunngatillugu arlaannut suleqatigiissutissanut ilanngunneqarsinnaanerat takorlooruminartorujussuuvoq, Ove Karl Berthelsen oqarpoq.

Branding Greenlandimut 2 million kronet ukiumut atorneqartaraluarput, ukiulli tulliani tamaallaat 1 million koruunit atorneqassapput.