Naalakkersuisut: Nuussinnaaneq akikinnerusariaqarpoq

Najukkami suliffissaqanngikkaanni nunaqarfimmut illoqarfimmulluunniit allamut suliffissaqarnissaq pillugu nuunnissaq akikinnerusariaqarpoq. Tamanna naalakkersuisut siunniuppaat. Aappaagumut aningaasanut inatsisissatut siunnersuummiippoq akikinnerusumik nuuttarnissaq 3,8 millioni koruuninik illuartitsiffigineqassasoq, kommuninilu nuuffiusuni illuliortiternissamut 25 millioni koruuninik immikkoortitsisoqassasoq. Kisianni sooruna taama nuuttarnissamut siornatigut aningaasaliisoqartanngeriarluni massakkut aamma aningaasaliisoqarnialersoq? Aningaasaqarnermut naalakkersuisoq Josef Motzfeldt aperaarput imalu akivoq:

- Suliffissaqarneq eqqarsaatigalugu inuuniarnikkut ajornartorsiutit nunap ilaaniittut nunap ilaani sulisussanik amigaateqartoqarpoq.

Josef Motzfeldt erseqqissaavoq ilaqutariit inuuniarnikkut ajornartorsiortut, allamullu nuunnissamut suliffeqarfinnit akiliunneqarsinnaanngitsut, suliffissaqarnikkut periarfissarissaarnerusunut nuuttalernissaat aningaasaliinikkut ammaanniarneqartoq.

- Nuuffissaminnik suliffissaminnik qulakkeeriumappata, inissaqartinnissaat, suliffissaqartinnissaat meeraasalu isumagineqarnissaat isumannaarniarlugit, aningaasanik illuartitsisoqassasoq massakkut siunnerfigaarput.

Nuukkasuarsinnaanermut aningaasanik illuartitsisalerniarneq illoqarfinnut imaluunniit nunaqarfinnut imminut akilersinnaarpianngitsunut nipaatsumik inuerusaaniarnertut siunnersuut isikkoqannginnersoq aperigatsinni Josef Motzfeldt akivoq:

- Naalakkersuisuninngaanniit taama isumaqanngilagut.

Inuiaat kalaallit inuiattulli allatut periarfissaq malillugu nuttartuartuusimapput. Aamma nunatta massakkut nunarsuup sinneranut aningaasaqarnikkut pituttoriartornera ilutigalugu tamavitta pitsaanerpaamik atugaqarnissaq angorusukkatsigu, tassuunakkut inuerusaaneq pinnagu periarfisseerusuppugut nunaqarfimmut allamut illoqarfimmulluunniit allamut nuukkusuttut, suliffissaminnik qulakkeerinnissimappata oqilisassivigerusuppagut.

-Kommuneqarfiit ineriartornikkut unittooqqasut nilliajuarput Namminersornerullutik Oqartussat suleqataaqqullugit. Aningaasat pineqartut suliffissaaleqiffiusuni ineriartortitsinermut atuinnarsinnaanngillat?

Josef Motzfeldt akivoq:

-Ullumikkut inuussutissarsiutinik ineriartortitsinermut aningaasaleriaatsit pitsarujussuit atorneqarput. Nunatsinni sumiikkaluartulluunniit, qularnaatsumik nammineq ingerlasinnaasunik inuussutissarsiutinik aallartitserusukkunik Namminersornerullutik Oqartussanut qinnuteqarsinnaapput. Kisianni, qanorluunnit ilungersortigigaluarutta, nunarput isorartoorsuaq tamaat pigissaartorsuartut isigigaluarutsiguluunniit, akilersinnaasunik tunisassiorsinnaaneq tassani naalagaasorujussuuvoq.

- Kommuninuku nutserarfiusinnaasut sorliit matumani pineqartut, Ilulissat, Sisimiut, Nuuk, Qaqortoq?

Josef Motzfeldt:

-Illoqarfimmi sumiluunniit inuussutissarsiutinik ingerlataqartut innuttaasut qinikkatik peqatigalugit periarfissanik pitsaanerpaanik ammaasserusuttut, tassaasussaapput siunissami inuit pinngitsoornatik nutserfissaat. Assersuutigineqarsinaavoq Qeqertarsuarmi imermik atuinialerneq suliffissarpassuarnik ammaassippat, qularnanngilaq Qeqertarsuaq ukiuni tulliuttuni suliartorusuttunik, saviup kajungerisaatulli isigineqassooq. Kommunit periarfissanik ammaassisut tassaasussaapput siunissami napanissaminnut qulakkeerinnittut.