Naalakkersuisut nunatsinnukarnissat unitsikkaat
Coronap Danmarkimi tuniluuttuarsinnarnera ernumanarpoq. Naalakkersuisut taamaammat iliuuseqarput.
Danmarkip nunattalu akornanni timmisartuussinerit ikilissapput.
Nunatsinnut angallannermut killilersuinerit ukiortaamiit januaarip ulluisa aqqaneq-aappaat ilanngullugu atuuttunik sukannernerulissapput.
Naalakkersuisut siulittaasuat, Kim Kielsen (S), taama nassuiaavoq.
- Pisortat taamaallaat upernaamisulli timmisartuunneqartassapput. Danmarkimit nunatsinnut angallassineq uani pineqarpoq. Tassa imaappoq, Danmarkimiit nunatsinnut januaarip ulluisa aqqaneq-aappaat ilanngullugu nalinginnaasumik timmisartuussisoqartassanngilaq, taanna oqarpoq.
Timmisartorlutik ukiortaap januaarillu ulluisa aqqaneq-aappaat akornanni angalanissamut bilitsillit iliuuseqassanngitsut, Kim Kielsenip ilanngullu oqaatigaa. Taakkua bilitsiisa allanngortinnissaat oqartussanit isumagineqassapput.
Januaarip ulluisa aqqaneq-aappaata kingorna killilersuinertalimmik timmisartuusseqqittoqartalissaaq.
- Angalanermi ataatsimi nunatsinnukartut 150-init amerlaneroqqusaanngillat.
- Suliniutit taakkua tuniluunnerusoqannginnissaanut aqussinnaanngisamillu tuniluuttoqalinnginnissaanut taavalu nunatsinni angallattoqaannarsinnaaneranik qulakkeerisuussapput, Kim Kielsen oqarpoq.
Akiuuussusiisoqaleruttornerani tuniluuttoqarataannaanissaa siooqqatigigaat
Ukiortaami sapaatit akunnerani siullermi nunatsinnukartussaagaluit 1000-usut, nakorsaaneq Henrik L. Hansen nassuiaavoq.
- Taakkunannga ilaat Danmarkimi ukiortaarsiussapput, ilaalu suli ukiortaanngitsoq misissorteqqeriarlutik nunatsinnukassapput, taanna oqarpoq.
Coronamut akiuussutissat nunatsinnut ippassaq marlunngornermi tikipput, sapaatillu akunnerata tulliani akiuussusiisoqartalissasoq, nakorsaanerup ilimagaa.
- Nunatsinni akiuussusiisoqaleruttornerani tuniluuttoqarpat erloqinassaaq. Tamanna akiuussusiinermut periusissiamik naapertuinissamut akornutaasorujussuussaaq, nakorsaaneq oqarpoq.
Taamaammallu Naalakkersuisut nunatsinnut angallassinerup ukiortaamiit januaarip ulluisa aqqaneq-aappaat ilanngullugu matusigallarnissaannik kajumissaarpai.
Danmarkimilu napparsimmavimmut unittut ulluni makkunani imaaginnavimmata danskit peqqinnissaqarfiat ilungersuasoq, nakorsaanerup ilanngullugu oqaatigaa. Covid-19-imillu tunillanneqarsimasunik nunatsinniit Danmarkiliaassisoqartariaqassappat danskit peqqinnissaqarfiat ingalluni ilungersualissasoq, nakorsaaneq nassuiaavoq.
- Tamanna nunatsinneersunik danskit peqqinnissaqarfianni inissaalatsitsisoqarneranik kinguneqarsinnaavoq. Tamannalu isumaliuteqaqqissaarnitsinnut tunngaviulluinnarpoq, nakorsaaneq nassuiaavoq.
