Naalakkersuisut nipituuliutiginagu nannunik pisasseeqqipput

Tasiilap kommuneata arlaleriarluni qinnuteqarnerata kingorna naalakkersuisut nannutasseeqqiinissamut akuersipput.

Ammassallip kommuneanit nannutassinneqaqqinnisssamik arlaleriarluni qinnuteqartoqarnerata kingorna, Tunumi nannuttassat qulinik ilaneqarput.

Naalakkersuisut juulip aallartisimalernerani akuersissummik tunniussipput, Inuussutissarsiornermut Naalakkersuisoq, Siverth K. Heilmann, naalakkersuisut sinnerlugit akuersisuulluni.

Tunumi nannuttassat qulinik ilaneqarnerannut tunngavigineqarpoq, Ammassallip kommuneata nannutasseqqinneqarnissaminik saaffiginneqattaarsimanera, Aalisarnermut Piniarnermullu naalakkersuisoqarfimmi allafffimi pisortaq, Amalie Jessen, oqarpoq.

Kommuunit allat nannutasseqqinneqarnissaminnut qinnuteqassagaluarpata taakkua akuerineqarnissaat naatsorsuutigineqarsinnaanersoq Amalie Jessen aperineqarami oqarpoq, qinnuteqaatit nalilersorneqarumaartut.

Pisassiissutit akuerineqaraangata nungukkaangataluunniit Namminersornerullutik Oqartussat tusagassiuutinut nalunaaruteqartarput. Tunumi nannuttasseeqqittoqarmat tusagassiuutinut nalunaaruteqartoqannginera pillugu Amalie Jessen oqarpoq, Aalisarnermut Piniarnermullu naalakkersuisoqarfimmit suna tamaat tusagassiorfinnut nalunaarugisarnagu, kisiannili Tasiilaq Illoqqortoormiullu nannuttasseeqqiinneq pillugu nalunaarfigineqarsimasut.

Illoqqortoormiormiut 30-nik Tasiilarmiut 20-nik 2008-mi nannutassinneqareerput, immikkullu akuersissuteqarnikkut qulinik ilaneqarlutik.

Immikkut pisassiissutigineqartut tallimat Tasiilami pisarineqareersimapput.