Naalakkersuisut malittarisassaliaanni nutaami ilinniartunik atorfinitsitsisoqartarnissaq piumasaqaataavoq

3 millioni koruuninik, taakkuluunniit sinnerlugit, akilinnik tuniniaasoqassatillugu ilinniartunik atorfinitsitsisoqartarnissaa pillugu Naalakkersuisut aggustip ulluisa aallaqaataanniit atuutilersumik malittarisassalioqqammerput, ilinniartunillu pinngitsoorani atorfinitsitsisoqartarnissaa siunissami piumasaqaataassaaq.
aggustip 04-at 2007 17:39

Malittarisassaq taanna suliariumannittussarsiuussinermut inatsimmut atavoq, tassani pineqarlutik Sanaartornermik Ilinniarfiit, Namminersornerullutik Oqartussanit aningaasalersorneqartut.

Kalaallit Nunaanni Sulisitsisut Peqatigiiffiat nittartakkamini taama allappoq.

Piginneqatigiillunili inissiat, nammineq akilikkamik sanatitat, taavalu 10-40-50-inik taaneqartartut, ilinniartunik atorfinitsitsisarnissamut ilaanissaannut piumasaqarfigineqanngillat.

Sanaartortoqarnerani, sanaartukkallu minnerpaamik 3 millioni koruuninik naleqarpata, tuniniaanermi ilinniartumik minnerpaamik ataatsimik sanatitsisoq atorfinitsitsisassasoq malittarisassami allassimavoq.

Sanaartukkat 6 millioni koruuninik naleqarpata, 9 millioni koruunilli ataallugit naleqarlutik, ilinniartut marluk atorfinitsinneqartassapput, taava sanaartukkat minnerpaamik 9 millioni koruuninik naleqarpata ilinniartut ikinnerpaamik pingasut.

Kalaallit Nunaanni Sulisitsisut Peqatigiiffiata eqqumiigaa, malittarisassaq taanna Namminersornerullutik Oqartussat nittartagaannut suli ikineqarsimanngimmat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq