Naalakkersuisut Lars-Emil Johansenip pakatsissutigai

Kalaallit Nunaanni pissutsit pillugit ataatsimiititaliap suleqatigiissitaliorniarnera Naalakkersuisut tapersinngilaat. Meeqqat kaattut qanoq ikiorserneqarsinnaanersut suleqatigiissitap sukkasuumik aalajangiifigisinnaassagai eqqarsaataagaluarpoq. Naalakkersuisulli ”qujaannarput”. Ataatsimiititaliaq ullumi ataatsimeeqatigereerlugu Lars-Emil Johansen pakatsisimaqaluni taama oqarpoq.
februaarip 26-at 2009 17:22

-Assorujussuaq pakatsivunga, isumaqaramami suliniuteqarnitsinni ataqqisimagipput, Kalaallit Nunaat pineqartoq. Isumassarsiarpummi unaagaluarpoq Unicef, Peqatigiiffik Kalaallit Meerartaat aamma Meeqqat Inuunerissut peqatigalugit suleqatigiissitaliussagaluartugut, Naalakkersuisut aamma Atugarissaarnissaq pillugu ministereqarfik qanoq iliortoqarsinnaaneranik taamaalilluta siunnersuuteqarfigisinnaallugit. Naalakkersuisulli tamanna tassa tapersersunngilaat, tamannalu tusaatissatut tiguvarput, Lars-Emil Johansen oqarpoq.

Lars-Emil Johansen isumaqarpoq nalunaarusianik tusarniaanernillu ingerlatsisimaneq qaangiutereersoq, meeqqallu ikiorneqarnissaat maanna pingaaruteqarnerusoq, ikiorsiissutillu suminngaaneerneri pingaaruteqarpallaanngitsoq.

- Kikkulluunniit ajornartorsiuteqalersinnaapput, tamannalu kusanaatsuunngilaq, kisianni kusananngilaq ajornartorsiuteqaraluarluni nassuerutiginnikkusunnginneq ikiuutinillu tiguserusunnginneq. Tamanna silatusaarnerunngilaq, ataatsimiititalialli tungaaniit soriaqqissinnaanngilagut, Lars-Emil Johansen oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq