Naalakkersuisut kujataanut tikeraartut: Innuttaasut naligalugit ataatsimeeqatigaagut

Nunatta kujataani innuttaasut najukkaminni naapinneqassapput.

Naalakkersuisut taama isumaqarput, taamaammat ilaasortat sisamat nunatta kujataanut angalallutik Naalakkersuisut suliaannik oqaloqatigalugillu innuttaasut qanoq eqqarsaateqarnersut tusarniarpaat.

- Ataatsimiititseriaaseq qangatut ataasiinnarmik innuttaasunut oqaluttunik pinngitsoq, kisiannili innuttaasut ataatsimooqatigalugit, naligalugit peqatigalugillu ingerlatsinermi taamatut Naalakkersuisut arlariinnerput aamma pitsaavoq, Múte B. Egede KNR-imut oqarpoq.

Múte B. Egedep saniatigut Nunalerinermut, Imminut Pilersornermut, Nukissiutinut Avatangiisinullu Naalakkersuisoq Kalistat Lund, Isumaginninnermut, Suliffeqarnermut, Nunamullu Namminermut Naalakkersuisoq Jess Svane aamma Nunanut Allanut, Inuussutissarsiornermut Niuernermullu Naalakkersuisoq Vivian Motzfeldt ataasinngormat aallartittumi angalaqataapput.

- Naalakkersuisunut ilaasortat arlallit angalaqatigiinneranni naalakkersuisoqarfiit akimorlugit, matumani aalisarnermut, takornariaqarnermut, nunalerinermut inuussutissarsiutinullu allanut tunngatillugu oqaloqatigiinnissamut periarfissaqarpoq, Múte B. Egede oqarpoq.

Illoqarfiit assigiinngitsut tikeraassagaat

Angalanerminni Narsarsuaq, Nanortalik, Qaqortoq, Narsaq kiisalu Alluitsup Paa tikissaavaat.

Illoqarfinni assigiinngitsuni tikitaminni innuttaasut ammasumik ataatsimeeqatiginissaannut qaaqqusipput.

Angalanerup ilaasortallu tikeraarnerata innuttaasut Naalakkersuisullu akornanni oqaloqatigiinnermik pilersitsinissaq siunertaasoq oqaatigaat.

- Angalanermi innuttaasut naapinneqarnissaat, takorluukkatsinnillu sulitsinnillu oqaluttuunnissaat kiisalu innuttaasut ulluinnarni atukkaminnik oqaluttuarnissamut periarfissaqarnissaat tunngaviusumik pingaarnerpaavoq, Múte B. Egede oqarpoq.

Naalakkersuisut ammasumik ataatsimiitsitsinermi saniatigut suliffeqarfiit arlallit pulaarnissaat Stine Egedep Kommune Kujallermi borgmesterip ataatsimeeqatiginissaat aamma pilersaarutigaat.

Múte B. Egedep oqarnera naapertorlugu nunatta kujataani innuttaasut kisimik tikeraarneqassanngillat.

- Nunatsinni tamarmi innuttaasut naapinnissaat pingaaruteqarpoq, Naalakkersuisunullu ilaasortat ataasiakkaat nunatsinni angalanissaminnik pilersaarusiarniarsaripput, taanna oqarpoq.

Naalakkersuisunut ilaasortat nunatta kujataanut angalanerat Narsami marsip ulluisa qulingiluaanni naammassissaaq.