Naalakkersuisut isumalioqatigiissitanik pilersitsinianngillat
- Siumumiit isumaqarpugut isumalioqatigiissitamik pilersitsinissaq orniginanngitsoq, isumaginninnikkut sulianut tunngasuni misissuinerpassuit pereernikuummata, isumaqarattalu ingerlariaqqinnissamut naammattunik sakkussanik misissuinertigut pissarsisoqareersoq, Siumup oqaaseqartua Isak Davidsen, Inatsisartut ullaap tungaa oqallinneranni oqarpoq.
Misissukkat ingerlanneqareersut takutitaat toqqammavigalugit peqqussutissamik ikiorsiinermut tunngasumik naalakkersuisut inatsisartut ukiaru ataatsimiinnissaanni saqqummiussissasut, taassuma kaammattuutigaa.
Suna pingaarnerua? Isumaqatigiissitaliorneq, imaluunniit ilaqutariinnnut meerartalinnut toqqaannartumik tapersersuineq ikorfartuinerlu? Atassutikkut oqaaseqartitaat Knud Kristiansen aperivoq, isumaqatigiissitanillu pilersitsisoqarnissaa tapersernagu:
- Isumalioqatigiissitanik pilersitsisoqarnissaa aaqqiissutaasussatut Atassummiit isiginngilarput, isumaqarpugulli illuatungaani Ilaqutariinnermut Pisortaqarfik nukittorsarlugu ilaqutariit isumaginninnikkut ajornartorsiortut pillugit immikkut sullissisussanik pilersitsisoqartariaqartoq, Knud Kristiansen oqarpoq.
Naalagaaffiit Peqatigiit Meeqqat Pisinnaatitaaffii pillugit Isumaqatigiissutaanni artikeli 27-p nunatsinnit unioqqutinneqarnera, Asii Chemnitz Narupip, Inuit Ataqatigiinneersup aalajangiusimavaa:
- Qaangiinnarsinnaanngilarput Naalagaaffiit Peqatigiit Meeqqat Pisinnaatitaaffii pillugit aalajangersagaat nunatsinnit unioqqutinneqarmat, Asii Chemnitz Narup oqarpoq, Meeqqat Inuusuttullu pillugit Ilisimasarfiup nalunaarutaani kingullermi uppernarsarneqartoq inuiaqatigiit akornanni ilaqartoq meeqqanik naammaginanngitsunik atugaqartoqartoq oqaatigalugu.
