Naalakkersuisut: Inatsisinik unioqqutitsinerunngilaq

Sanaartorneq ½ milliardi koruuninik naleqartoq Sulisitsisut Peqatigiiffiannit isornartorsiorneqaraluarpoq, Danamrkimilu illussanik titartaasartut suliffeqarfiat, C. F. Møller, politiinut unnerluutiginiarlugu Sulisitsisut Peqatigiiffiata eqqarsaatigigaluarpaa. Sulisitsisut Peqatigiiffiat oqaraluarpoq C. F. Møllerip inuussutissarsiorsinnaanermut inatsimmik unioqqutitsilluni iliuuseqarsimasinnaanera sanaartortitsinermi sumilluunniit takussutissaqanngitsoq, Kalaallit Nunaannimi najukkami allaffeqarfeqanngimmat, tamannami inatsisitigut allassimavoq. Naalakkersuisulli tassa ullumi allapput, inatsisinik unioqqutitsisoqanngitsoq. Siunnersuinermik suliassamut neqerooruteqartitsisarnissamik maleruagassiuisumik Kalaallit Nunaanni inatsiseqanngilagut. Taamaattumik Sanami sanaartortitsinerup pilersaarusiorneqarnerata suliariumannittussarsiuunneqarnissaa inatsisit naapertorlugit pisussaaffiunngilaq.