Naalakkersuisut: Ilinniartut ineqarfii tamarmik ikuallattuulernermut kalerrisaaruteqassapput
Sisimiuni ilinniartut ineqarfianni sapaatip akunnerata siuliani sisamanngornermi ikuallattoqarpoq.
Ikuallattoqarnerani ajoqusertoqanngilaq ajornerusimasinnaagaluarporli. Ikuallattuulernermummi kalerrisaarutinik nalinginnaasunik atortunillu inissiami peqanngilaq.
Tamannali tamaannga killeqassasoq, naalakkersuisoq isumaqarpoq.
Ilinniartut ineqarfiini mikinerusuni ikuallattuulernermut kalerrisaaruteqarnissaanut inatsiseqanngitsoq
Ineqarnermut naalakkersuisup oqarnera naapertorlugu illuliornermut malittarisassat maanna suliarineqaleruttorput. Uanilu ikuallattuulernermi kalerrisaaruteqartarnissaa piumasaqaataalissaaq, najugaqarfinnilu allani peqanngitsunik ikkusuisoqartalernissaa aamma piumasaqaataalissaaq. tassalu ilinniartunut inissiaannaanngitsuni, illunilu najugaqarfiusuni tamangajanni. Aamma inatsit aqqutigalugu illut pioreersut putsumut kalerrisaarusersorneqarnissaannut qanoq annertutigisumik piumasaqartoqarsinnaanersoq Naalakkersuisoqarfimmit misissuiffigineqarpoq.
Ineqarnermut Attaveqaqatigiinnermullu Naalakkersuisoq Karl Frederik Danielsen oqarpoq:
”Illuliornermut malittarisassanut siunnersuut ukiumi tulliuttumi tusarniaassutigineqareernermi kingorna erngerluni atuutilernissaa naatsorsuutigaara.
Nunatsinni ilinniartut ineqarfiini najugaqartut ikuallattoqarnissaannut qanoq sillimaffiginiarneqarnerannut assigiinngitsumik iliortoqartoq, ilinniartut ineqarfiisa aqutsisoqarfiinut KNR-ip sianerluni paasiniaanerani paasineqarpoq
Assersuutigalugu Ilulissani Lions Kollegiet arlaatigut kalerrisaaruteqanngillat, ineqarfinnili pingasuni ikuallattuulernermut kalerrisaarutit ataasinngornermi ikkussorneqassasut KNR-imut ilisimatitsissutigineqarpoq.
AAMMA ATUARUK Ilinniartut ineqarfiini ikuallattuulernermut kalerrisaarutit piumasaqaataanngitsut
Campus Kujallermi kollegieinspektørip ilinniartut ineqarfiini arfinilinni tamani ataatsimoortarfinni ikuallattuulernermut kalerrisaaruteqarnerarpaa, ilinniartullu 18-it inorlugit ukiullit ineqarfianni ineeqqat tamarmik immikkut kalerrisaaruteqarnerarlugit.
Nuummi Upalungaarsimanermut Pisortap ilinniartut ineqarfiisa ataatsimoortarfiini kalerrisaarutit inissiani ineqartunut tamanut itertitsisinnaasumik nipeqartartut paasissutissiissutigaa.
Sisimiuni ilinniartut ineqarfianni sapaatip akunnerata siuliani ikuallattoqarnerata kingorna qatserisartut inissiamut akisussaasumut attaveqarput, ikuallattuulernermullu kalerrisaarutinik ikkussuisoqarnissaanut isumasiueqqullugit, sermitsiaq.ag allappoq.