USA-p aalajangersimasumik sinniisoqarfeqalerniarnera naalakkersuisut tikilluaqquaat

- Kalaallit Nunaat amerikap avannarliup nunavittaanut ilaavoq. Nunap sumiiffiinnaatiguungitsoq aammali nunap inuii, kulturiat oqaatsillu Alaskamiunik Canadallu Issittortaanik avitseqatigiissuteqarfigalugit, Ilinniartitaanermut, Kultureqarnermut, Ilageeqarnermut Nunanullu Allanut naalakkersuisoq Ane Lone Bagger oqarpoq.

USA-p Kalaallit Nunaatalu akornanni aningaasatigut avitseqatigiinnikkullu suleqatigiissinnaanerit naatsorsuutigineqartariaqartut naalakkersuisut oqaatigaat:

- Taamaattumik USA Nuummi aalajangersimasumik sinniisoqalernissaat nuannaarutigaarput, oqaluuserisassaqarluarattami. Tamatuma amerikamiut nunatsinnut inuiaqatigiinnullu paasinninnerulersissavaat, tamannalu pitsaasumik angusaqarfiusumillu suleqatigiinnissamut pingaaruteqartuuvoq, Ane Lone Bagger oqarpoq.

Mittarfinnut suliniutit 2023 aallarnerfigalugu toqqaannartumik Nunatsinnit USA-mut timmisartuussisinnaanngornissamut periarfissaqalersitsissasoq, taassuma oqaatigaa.

Taakku saniatigut imaatigut angallassinermi 2019-mit ilaatigut Portlandimit Mainemiittumut Royal Arctic Line - Eimskip suleqatigalugu ammaasseriissaaq. Ineriartornerup tamatuma nunarput annertunerusumik tikikkuminarsisissavaa, naalakkersuisut oqarput.

Island Nuummi 2013-imi sinniisoqalerpoq. Tamanna Kalaallit Nunaannut ineriartornermut pingaaruteqarpoq, tassami Islandip General Konsuliata sorsunnersuup aappaata qaangiunneranit sinniisoqarfimmi ammaanerit siullersaraat. USA Nuummi siusinnerusukkut sinniisoqarnikuuvoq. 1940-mit 1953-mut maanna nakorsaaneqarfiup illutaani allaffeqarsimallutik. Illu taanna amerikamiut nammineq sananikuuaat.