Naalakkersuisut EU eqqartuussivilersuuteriaannaavaat

- Siusinnerusukkut Canadap eqqartuussivilersuussiniarnera uani puisit amiisa niuerutigineqaqqusaanerat pillugu soqutiginartutut isigisimavarput, taamaattumik aamma naalakkersuisuni misissutisitsivugut, taamatut eqqartuussivilersuussiniarnermi EU qanoq iliorniarnersoq aammalu minnerunngitsumik nunatta eeqartuussivilersuussinermut taamaattumut peqataasinnaaneranut periarfissat qanoq innersut, Kuupik Kleist oqarpoq.

Apeqqutaalerpoq misissuisitsineq qanoq inerneqarumaarnersoq.

- Paasisariaqarparput Kalaallit Nunaat eqqartuussivilersuussinermi peqataassagaluarpat suut ajoqutaassanersut suullu iluaqutaassanersut, nangippoq.

Danmarkip EU-mut ilaasortaanera naalagaaffeqataasumut Kalaallit Nunaannut apeqqutinik ajornakusoortorpassuarnik pilersitsissasoq aamma oqaatigaa.

- Taamaattumik nalilersueqqissaartariaqarpugut, kisianni maluginiarpara EU-mi taamatut ippassaq aalajangernermut atatillugu Danmarki illuatungiliuttoq. Danmarki isumaqarpoq EU-p taama aalajangernera tunngaviusumik isumaqatigiissutinut aammalu niuernikkut nunarsuarmi pissusilersornissamut isumaqatigiissutinut akerliusoq. Taanna pingaaruteqarluinnarpoq suli, Naalakkersuisut siulittaasuat oqarpoq.

Kuupik Kleist isumaqarportaaq pingaaruteqarluinnartoq tassaasoq, puisit amiisa nunatsinninngaanneersut inerteqquteqarnermi ilaatinneqannginnerat erseqqissaatigiuassallugu.

- Puisit amiinik niueruteqarneq tamarmi sunnerneqassasoq ilimagineqartariaqarpoq, nunatsinnit allatut iliortoqarsinnaanngippat puisit amiisa nunatsinneersut EU-p avataaniittunut nunanut tunineqarsinnaanersut misissuiffigineqartariaqassaaq - saniatigullu nunatsinneersut tunineqarsinnaanerat erseqqissaatigisariaqassalluni, Kuupik KLeist oqarpoq.

Puisit amiinik nioqquteqartarnerup inerteqqutaalernissaa EU-mi taasissutigineqarmat Danmark Rumænialu kisimik siunnersuummut taaseqataanngillat.