Naalakkersuisut: Attartortut nalunaartussaatitaanerannik eqqussinissaq pisariaqanngilaq

Naalakkersuisut siulittaasuata Kuupik Kleistip, parteeqatiminut Olga P. Berthelsenimut akissuteqaataani tamanna atuarneqarsinnaavoq.

Attartortumut kisermaamut toqukkut qimaguttumut kisimiillunilu attartortitami najugaqarsimasumut qimagaasut attartornerup taamaatinneqarnerani toqusimasup akiligassaanut pisussaaffilerneqarnermik imaluunniit kimigiiserfigineqarnermik misigisimalernissaasa pinaveersaartinneqarnissaat qanoq isilluni anguniarneqarsinnaanersoq, Olga P. Berthelsenip apeqquteqaatigaa, naalakkersuisulli siulittaasuat Kuupik Kleist naalakkersuisut sinnerlugit allappoq ilimagisariaqartoq nalunaartussaatitaaneq toqusoqarneranut atatillugu attartornerup atorunnaarnerani qimgaasunut pisussaaffii pillugit attartortitsisumut pisussaaffittut ataqqinnilluni nalunaaruteqartarnissaa pineqanngitsoq:

- Pissutsit massakkut atuuttut malillugit pisortatigoortumik pigisanik kingornussanilluunniit nalunaarsuisoqarlunilu agguaassisoqassappat kredsretip attartortitsineq unitsittussaavaa. Pigisanik agguaassisarnermut eqqartuussiviup pigisanik suliaqarneq suliarisussanngussavaa, inuup toqukkut qimagunneraniit toqukkut qimaguttup pigisaasa suliarinerisa naammassinissaasa tungaanut, Kuupik Kleist akissuteqaammi ilaatigut allappoq.

Kingornussassanik nammineerluni agguaassisoqartillugu inissiamik attartortitsineq atorunnaassappat qimagaasut kingornussisussatut toqukkut qimaguttup pisussaaffiinik tigusissapput. Pisortatigoortumik nammineerlunilu agguaassisoqarnerani attartortinneqartup atorunnaarsinneqarnani aningaasartuutit pigisarineqartunit akilerneqassapput. Annertunngitsumik pigisaqarfiusumi aningaasartuutit akilerneqarnissaannut akissaqarfiunngitsumi qimagaasut toqukkut qimaguttup pisussaaffiinik tigusaqassanngillat, attartortitsisullu attartortitsinermi atorunnaarnerani annaasat nammineerluni nammassavai, naalakkersuisut siulittaasuat allappoq.

Naalakkersuisut taamaalillutik isumaqarput toqusoqarsimatillugu attartortitap atorunnaarsinneqarneranut atatillugu attartortut nalunaartussaatitaanerannik eqqussinissaq pisariaqanngitsoq.