Naalakkersuisut arfernut eqqissisimatitsivissamut akerliupput

Atlantikup kujataani arfernut eqqissisimatitsivissamik pilersitsinissamik siunnersuut danskit naalakkersuisuisa akuersaarmassuk, Nunatsinni naalakkersuisut akueriuminaatsittorujussuuaat. Aalisarnermut, Piniarnermut Nunalerinermullu naalakkersuisoq, Finn Karlsen tusagassiorfinnut nalunaarummini allappoq.
Allattoq Louise M. Kleemann
juunip 11-at 2008 13:11

Danmarkimi naalakkersuisut Folketingip avatangiisinut ataatsimiititaliaani ullumi isumasioqatigiittoqarnerani illuatungiliuttunit tatineqarlutik eqqissisimatitsivissamik pilersitsinissaq tapersersulerpaat.

Taamaattumik nunatsinni naalakkersuisut piumasaraat, Arfanniarneq pillugu Ataatsimiititaliarsuarmi Danmarkip taasinerminut atatillugu nalunaarutigissagaa, siunnersuut Kalaallit Nunaata ersarissumik akerlerigaa.

Nunatsinni naalakkersuisut piumasarisarpaat arfernik eqqissisimatitsivinnik taamaallaat pilersitsisoqarsinnaasoq, tamanna ilisimatusarnikkut tunngavissaqarpat kiisalu naalagaaffiit qanittumiittut immamut sineriallit tamatumunnga isumaqataappata.

Arfernut eqqissisimatitsivinnut tunngatillugu Savalimmiuni naalakkersuisut Kalaallit Nunaannik tapersersuisut, nunatsinni naalakkersuisut ilisimatitsissutigaat.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq