Naalakkersuisut aningaasartuutigisartagaat Demokraatit tamanit takuneqarsinnaasunngortikkusukkaat
Demokraatit siunnersuutigaat angalanernut, ilassinninnernut tunissutinut il.il. aningaasartuutit Naalakkersuisut nittartagaanni tamanit takuneqarsinnaasariaqartut, allannerattut "innuttaasut akileraarutaannik akuerineqarsinnaanngilluinnartumik pinnguarnerit pinaveersimatinniarlugu".
Aamma atuaruk Aleqa pillugu suliaq Namminersorlutik Oqartussanit nassuiaatigineqartoq
- Aamma Naalakkersuisut angalatillutik sunik aningaasartuuteqartarnersut takuneqarsinnaasariaqarpoq. Tassa pingaaruteqarpoq aamma atorfillit angalaqataasut aningaasartuutaasa takuneqarsinnaasarnissaat, takuneqarsinnaaqqullugu angalanerit qanorpiaq akeqartarnersut, Demokraatit siulittaasuat, Anda Uldum, taama allappoq.
Aamma erseqqissaatigaa siunnersuutip piviusunngortinnissaa suliaqutaanavianngitsoq, immikkuualuttut tamaasa nalunaarsorneqareertarmata. Aamma Naalakkersuisut aningaasartuutigisartagaasa tamanut takuneqarsinnaasunngortinnerisigut allagaatinik takunninnissamut qinnuteqaatinut allaffissornikkut sipaaruteqartoqarsinnaanerarpaa.
