Naalakkersuisut akissuteqaatai naammaginngilai
KNI-mi 75 millioni koruuninik amigartooruteqarneq arlaatigut kinguneqassanersoq Inuit Ataqatigiit sinnerlugit inatsisartuni ilaasortaq, Ane Hansen, naalakkersuisunut apeqquteqaateqarpoq.
Namminersornerullutik Oqartussani atorfillit KNI-mi pissutsinik misissuereersullu, KNI-mi pissutsit maannakkorpiaq ernumanartoqanngitsut naliliisoqarpoq, akissullu taanna Ane Hansenip naammaginartinngilaa:
- Ingerlatseqatigiiffiit namminersortunik ingerlanneqartut allat, soorlu tunisassiorfiit assartuinermik ingerlataqartut, pisortat suliffeqarfiutaasa taama isumaqatigiissusiorfigineqarnerat pissutaalluni ernumanarmat, tamanna naammaginavinnersoq apeqquserneqarsinnaavoq. Taamaattorli assigiinngitsut apeqquteqaateqarnerisigut, KNI-mi pissutsit Aningaasaqarnermut Inuussutissarsiornermullu Ataatsimiititaliamit qanimut malinnaaffigineqalermata nuannaarutigaara, Ane Hansen oqarpoq.
KNI-p amigartoorutai katillugit 75 millioni koruuniupput, taakkunani 27,8 millioni koruunit Arctic Green Food-imeersuullutik.
Naalakkersuisut tamanna iliuuseqarfiginiarneraat Ane Hansenimit aamma apeqquserneqarpoq. Ane Hansenip tamanna ima tunngavilersorpaa:
- Ingerlatsilluartut taama angusaqarneq ajormata tamanna apeqquserneqarsinnaavoq. Naleerutitassat assigisaalu siusinnerusukkut eqqumaffineqarsimasuuppata taamarsuaq amigartoortoqarsimassanngikkaluarpoq. Suaat akikilliartorsimaneri ilisimasimagaanni, takusinnagaannilu akikilliartortut, piffissagallartillugu iliuuseqartoqarsinnaagaluarpoq. Siunissarlu eqqarsaatigalugu tamakku eqqumaffiginissaat pingaaruteqarluinnarpoq, Ane Hansen oqarpoq.
Arctic Green Food-ip sulisoqarnermut aningaasartuutinik sippuilluni atuisimanerata kingunissai, Demokraatit sinnerlugit inatsisartuni ilaasortap, Marie Fleischerip, naalakkersuisunut apeqquteqaatigaa, Ane Hansenimillu taperserneqarpoq, oqartumit, sippuilluni atuinerit pitsaanngitsuusut.
