Naalakkersuisut aalisartunut maleruutiinnalerput

Aalisakkat pisarineqarsinnaasut ukioq manna nungunnerisa kingorna kommunit aamma KNAPK piumasaqarput aalisakkanik pisassiisoqaqqittariaqartoq, taamatullu noqqaaneq Naalakkersuisut nakkaannarfigaat.

Uummannarmiut eqqaamiuisalu umiatsiaararsorlutik aalisartuisa maanna ukiup sinneranut aalisarsinnaalerpaat qalerallit 250 tonsit, angallatilli anginerit aalisaannassagunik allami aalisarsiorfissarsiortariaqarput.

Ukioq manna aappassaa qalerallit pisarineqarsinnaasut qaffanneqarput. Siullermik qaffaasoqarmat 5.549 tonsinut qaffanneqarput 5.000 tonsiinaanikuugaluartut.

Ukioq mannamut saarulliit pisassiissutigineqartut 7.000 tonsit, aalisartunit 765-usunit pisarineqareersimalerput, tassalu saarullittassat 1500 tonsinik ilaneqaqqipput. KNAPK-p piumasarigaluarpaa 3.000 tonsinik pisassiisoqaqqissasoq.

- Sineriapput saarulleqaqaaq, taamaattumik pisasseeqqittoqarsinnaanera ajoqutaanavianngilaq, KNAPK-p siulittaasua, Leif Fontaine AG-mut oqarpoq.

Saarulliit pisassiissutigeqqinneqartut siorna aalisanngitsuukkanit nuutaapput. Siorna saarulliit 2.192 tonsit pisassiissutigineqaraluarput.

Kujaataani aalisartut aamma pisasseqqinneqarput. Narsami Qaqortumilu saattuarniat pisarisinnaasaat 150 tonsinik ilaneqarput, pisasseeqqinnerit tamaasa ataatsimut isigalugit taqqavanimiut amerlanerpaanik pisasseqqinneqarput. Taqqavani saattuat pisassiissutit 300 tonsiupput, taakkuli tamakkerneqarmata 150 tonsinik pisassiisoqarnissaa qinnutigineqarluni. Nukiginnartumik qinnuteqartuupput Kommune Kujalleq Narsaq Seafood peqatigalugu.

- Maani saattussat kusanartuuneri nunani allani tunisiffigisartakkatta oqaatigisarpaat. Soormi Naalakkesuisut taamaatoqarnera tapersersunngilaat, uffa Nunatsinnut aningaasarsiutaasoq pitsaasoq, Kommune Kujallermi borgmesteri, Simon Simonsen tunngavilersuivoq.

Tassalu maanna qinnutaa tusarneqarluni piviusunngorpoq.