Naalakkersuisut aalajangiipallattarnerat Aalisartut Piniartullu Partiiata naammaginngilaa

Nunatsinni nalakkersuinikkut suliniaqatigiiffiit partiivi arfinilinngorput. Ippassaq partii pilersinneqartoq taaguuteqarpoq Aalisartut Piniartullu Partiiat.

Maannamut naalakkersuisuni inatsisartunilu ilaarsortaasut aalisartut piniartullu atugaannik suusupaginninnerat naammagiiunnaarlugu partiimik pilersitsinerminnut tunngavilersuutaasa ilagaat. Naalakkersuisut pipallattumik aajalangiisarnerat naammagineqarunnaarpoq.

Ukiuni kingullerni aalisartut piniartullu atugaasa ilungersunartorsiorfiujartornerat tamanna miserratigineqarsinnaanngilaq, tamannalu partiiliornermi patsisit annersaaraat Leif Fontain oqarpoq. Naalakkersuisut pipallattumik aalajangiisarnerat ukiuni kingullernik aalisartunut piniartunullu ilungersornartorsiufiusarsimavoq, tamannalu piniartut aalisartullu naammagiunnaarsimavaat. Siorna assagiarsunniarnermi assagiarsoqarnerpaaffiani matuneqariasaarpoq, tamannalu inuussutissarsiornermi assut eqqusimavoq. Puisit amiissa tapiissutitaat nungummata unitsinneqarput soorlu siorna juullilersoq unitsinneqarput, tamannalu pipallanertut aalajangiineruvoq Leif Fontain oqarpoq.

Inatsisartuni Aalisartut Piniartullu Partiiat isertitaqarpat maannakkut inatsisartuni partiiusut tamaasa suleqatigisinnaalugit naatsersuutigaat, akunnermiuliuttuullutik. Assersuutigalugu timmissat amerliartuinnartut piniarneqarluarsinnaasut piniarneqarsinnaannginnerat naammagineqarunnaarpoq, tamannalu inatsisartuni isertitaqarunik nammineerlutik sorsuutiginiarpaat.

Aalisartut Piniartullu Partiiata siulitaasoraa Leif Fontain Leif Fontain Sisimiut , Siulittaasup tulliatut inissippoq aalisartoq piniartorlu Pavia Nielsen Uummannaq, allatsiulluni ilinniartitsisoq Thimothæus Poulsen Atammik, siulersuisuni ilaasortanngorput Ole Jørgen Davidsen Narsaq, kiisalu Johannes Rosing Maniitsoq tamarmik aalisartuullutillu piniartut.

Partii nutaaq inatsisartunut qinigassanngortitaqarniarluni atsiornernik katersilluni aallartissaaq.