Naalakkersuisut aalajangernerat akueriuminaappoq

Narsami meeqqanut inuusuttunullu ulloq unnuarlu angerlarsimaffissap sananeqarnissaa piffissami aalajangersimanngitsumi kinguartinneqarpoq.

Aningaasat angerlarsimaffimmut tassunga atorneqartussat, Sisimiuni ulloq unnuarlu angerlarsimaffiup, Gertrud Rask Minde-p, allanngortiterneqarnissaanut atorneqassasut Naalakkersuisut aalajangiuppaat.

Narsami borgmesterip, Kiista P. Isaksenip, tamanna nukillalaarutigeqaa kamaammiutigalugulu, oqarporlu Naalakkersuisut aalajangernerat AG-mi atuarlugu aatsaat paasillugu.

- Aningaasanut inatsisissaq ukioq-mannamut atuuttoq akuerineqarmat ersersinneqarpoq Narsami meeqqanut inuusuttuaqqanullu ulloq unnuarlu angerlarsimaffissamik pilersitsinissamut akuerineqarsimasugut, qinnuteqartarsimanerput tungavigalugu. Angerlarsimaffik taanna Kalaallit Nunaat tamakkerlugu atuuttussaavoq, uagullu qilanaarisimaqaarput. Atorfilittavut taama pilersitsinissamut sulisippavut, piareersartillugit, aamma pisariaqartitsineq annertummat. Maannalu uumitsaatigisara tassaavoq allakkatigut ilisimatinneqannginnatta, sianerfigineqanngilagut, aviisi aqqutigalugu ilisimatinneqarpugut angerlarsimaffiliornissaq unitsinneqarsimasoq. Taamatut sullisseriaaseq akueriuminaatsorujussuuvoq, kommunini pimoorussilluni ineriartortitsilluni suleqataaniarluni, aamma meeqqat angajoqqaat sumiginnarsimasaat suleqataaffigerusullugit, iliuuseqarfigeqataarusullugillu, qulaatiinnarluta taama aalajangiineq nuanninngitsorujussuuvoq, akuersaaruminaappoq aamma, Ksta P. Isaksen oqarpoq.