Naalakkersuisussanik suli tusarliussisoqanngilaq
Aningaasanut inatsisissaq aappaagumoortoq partiinut naalakkersuisunut illua´tungiliuttunut suli isumaqatigiinniutigineqarmat, naalakkersuisunut ilaasortanngorumaartussanik taasaqarsinnaanani, naalakkersuisut siulittaasuat Siumumeersoq Hans Enoksen oqarpoq. Naalakkersuisoqarfiilli marluk inuttalerneqassagunarput.
Naalakkersuisut siulittaasuata Hans Enoksenip naalakkersuisussanik Inatsisartunut inassutigisassaminik avammut tusarliussinissani marloriarluni kinguartereerpaa, ippassarlu ullumimut kinguartitsinerminut tunngavilersuutigaa, aningaasanut inatsisissap partiinut naalakkersuisunut illua´tungiliuttunut isumaqatigiinniutigineqarnera naammasseqqaartariaqartoq.
- Isumaqatigiinniarnerit naammassippata aternik taasaqarsinnaalissaanga. Naalakkersuisut siulittaasuat ippassaq taama oqarpoq.
Taamaattorli naalakkersuisoqarfinnik allanngortiterinissamik pilersaaruteqannginnerarpoq.
Taamaalilluni aalisarnermut piniarnermullu naalakkersuisuusimasup Rasmus Frederiksenip aamma ineqarnermut attaveqarnermullu naalakkersuisuusimasup Jens Napãtuup naalakkersuisuuffigisimasaasa inuttalerneqarnissaat ilimanaateqarpoq.
Kikkut naalakkersuisunngortinneqassanersut oqaluuserineqangaatsiarsimavoq, Radioavisimillu Siumukkormiut nuiamanerit arlallit oqaloqatigisimavavut, amerlanerpaartaalli naalakkersuisunngorusunnerlutik aperineqassagaluarunik itigartitsiumasimapput.
Oqaloqatigisatta aamma ilaata aalisarnermut piniarnermullu naalakkersuisoqarfimmik Hans Enoksenimit neqeroorfigineqarnini itigartissimavaa, paasisavullu naapertorlugit naalakkersuisunngortussap aappaa inatsisartuni ilaasortaanngilaq.
Naalakkersuisut siulittaasuata tullia Aningaasanullu Naalakkersuisoq Inuit Ataqatigiinneersoq Josef Motzfeldt naalakkersuisussanik tusarliussinissamut kinguartitseqqinnermut oqaaseqarumanngilaq. Namminersornerullutilli Oqartussat Tusagassiiviata nalunaarutigaa, Josef Motzfeldt USA-mut angalasussanngortoq, ilaatigut New Yorkimi FN-ip ataatsimeersuarnissaata ammarneqarneranut arfininngorpat pisussamut peqataajartorluni. Taamatuttaaq Tartupaluk pillugu ataatsimeeqateqassaaq, EU-milu nunat ilaasortanngorlaat arlallit ataatsimeeqatigissallugit.
