Naalakkersuisunut piumasaqaatit sakkortusiartorput

Irakimi naalakkersuisunut nunap isumannaatsuunissaa pillugu akisussaaffimmik tigusinissaq sakkortusiartorpoq. Tuluit Nunaanni isumasiuinerit kingulliit takutippaat amerlanerussuteqarluartut tuluit sakkutuuisa Irakimiittut ukiup naannginnerani angerlartinneqarnissaat kissaatigigaat – aammattaaq piffissaq taanna nallertinnagu eqqissisimaneq isumannaatsuunerlu anguneqarsimanngikkaluarpataluunniit:

Tuluit Nunaanni aviisi The Guardian allappoq 61 procentit kissaatigigaat tuluit sakkutuui Irakimit ukioq manna naatinnagu angerlartinneqassasut.

Ukiup ataatsip matuma siornagut isumasiuinermi 51 procentit isumaqarput tuluit sakkutuui suliassartik aatsaat isumagereerunikku Irakimit angerlartinneqartariaqartut.

Isumasiuinerup uissuumminartoraa tuluit amerlanerussuteqartut isumaqarmata tuluit sakkutuui angerlartinneqartariaqartut, Irakimi isumannaatsuunissaq qanorluunniit paatsiveqanngitsigigaluarpat aamma Amerikamiut oqaraluarpataluunniit tuluit sakkutuui Irakimiiginnartariaqartut.

Isumasiuinerup uppernarsarpaa tuluit aamma Amerikamiut sakkutuuisa piaartumik angerlartinneqartariaqarnerannik nunani taakkunani naalakkersuisut piumaffigineqaleraluttuinnarnerat.

Tuluit nutaarsiassaqartitsiviat BBC nalunaarpoq Amerikamiut Irakimi naalakkersuisut utaqqikatalluinnaraat, isumaqarlutillu Irakimi naalakkersuisut nunap isumannaatsuunissaa inatsisillu malillugit ingerlatsisoqalernissaa paamaaruppallaaraat.

Aviisi The Times allappoq ukiup ataatsip ingerlanerani

Irakimiut politiivisa sakkutuuisalu Irakimi isumannaatsuunissaq inatsisillu malillugit ingerlatsilernissaq isumagilersinnaanavianngikkaat. Tassami sakkutuut naammaginartumik ilinniartinneqanngillat ullut tamaasa eqqissiviilliornernut isumaginnittutut sulisariaqartaramik.