Naalakkersuisunut ilaasortat Inatsisartunit sulinngiffeqarallarput
Tamannalu pissutigalugu Inatsisartunut sinnissuussanik arlalinnik aggersaasoqarsimavoq. Taamaasillunilu ilaatigut Atassutip siulittaasua Gerhardt Petersen politikkimut uterpoq. Peqqissutsimut attaveqarnermullu naalakkersuisunngortoq Steen Lynge Inatsisartuni taarsissavaa, taannami nunatsinni politikkikkut akisussaaffeqarfiit oqimaannersaasa ilaat naalakkersuisuuffigilerpai.
Siumukkunni aamma Per Berthelsen marsip aappaani qinigaanngitsoortoq politikkikkut suliaqarnermi nanginnissaanut periarfissinneqarpoq. Aammattaaq Kaj Lyberth Anders Olsenilu Inatsisartunut ilaasortanngorput, Jens Erik Kirkegaardip, Karl Lyberthip Vittus Qujaukitsullu Naalakkersuisutut sulinissartik pissutigalugu Inatsisartuni sulinerminnit sulinngiffeqarnissaminnik qinnuteqarsimammata.
Lars P. Mathæussen aamma Inatsisartunut ilaasortanngorpoq, naak taaguunneqarnermi malitsigisaanik sinniisussaannartut inississimagaluarluni. Tamanna Nikku Olsenip partiimini qinigaanerpaajusup Inatsisartunut ilaasortatut naleqqutinngitsutut aalajangiiffigineqarneranik pissuteqarpoq.
