Naalakkersuisunngortut nutaat marluk ullumi ilisaritinneqarput
Naalakkersuisoqatigiit pilersinneqarnerisa kingorna, Naalakkersuisullu inissitsiternerisa kingorna, Siumukkormiut ilaannit tamanna ilaatigut iluarineqarsimanngilaq, soorlu Hans Enoksen aamma Kim Kielsen Naalakkersuisuuffinnik tunineqannginneri iluarineqarani.
Taamaammat ullumi kikkut Naalakkersuisunngortut aqqi taaneqarmata tupaallaatissaanngilaq Kim Kielsen Naalakkersuisunut ilaasortatut ivertinneqarmat.
Naalakkersuisumit ataatsimit akisussaaffigineqarsimasut marlunnut akisussaaffigilersinneqarneri, Naalakkersuisut Siulittaasuata, Aleqa Hammondip ima oqaatigaa.
- Naalakkersuisoqarfiit arfineq pingasuusimagaluartut quligiluanngortinneqarneri periarfissatsialattut isigisimavara. Miiti Lyngep akisussaaffii annertoorujussuit marlunngorlugit avinneqarnissaat Naalakkersuisut siulittaasuattut pisariaqartoq takusimavara, Aleqa Hammond oqarpoq imalu nangilluni.
- Ineqarnermut tunngasut tamanna Naalakkersuisunut nukinnik annertoorujussuarnik atuisussaareerpoq aamma avatangiisit eqqarsaatigalugit tamanna nukinnit annertuunik piffissamillu annertuumik Naalakkersuisunut atuisussaalluni. Akisussaaffiit naalakkersuisumit ataatsimit tigummineqarsimasit marlunnut avinneqarnerisa nassatarissavaa, Naalakkersuisunngortut piffissaqarnerullutik sulinissaat, tamannalu inuiaqatigiinnut pitsaasumik iluaqusiilluni nukittoqutigineqassaaq.
Aleqa Hammondip erseqqissarpaa, aatsitassarsiornerit aallartinneqarpata avatangiisit pillugit oqartussaqarfik pingaaruteqarlualersussaammat, Kim Kielsenip tamatumunnga piukkunnassutsini ersersikkumaaraa, tassami Kim Kielsenip avatangiisinut tunngasut ersarissumik uummateqarfigimmagit.
Kim Kielsenip ilisaritinneqareernerata kingorna Radioaviisimit apersorniarsimagaluarparput, suliassanilli arlalinnik ulapputeqarnini pillugit apersorneqarnissaminut piffissaasuanini nalunaarutigaa.
Atassummi ilaasortamik Naalakkersuisussamik toqqaasoqalernerani Siverth K. Heilmann toqqarneqarpoq. Taanna aperaarput sooq Atassutip siulittaasua toqqarneqarsimannginnersoq, Siverth K. Heilmann ima akivoq.
- Qinersinermi kingullermi inuttut qinigaanerpaaq soorunami Naalakkersuisunut ilaasortassatut qinigaanera pissusissamisuuginnarpoq, tassami Sten Lynge-mut tulliullunga qinigaanerpaavunga, Siverth K. Heilmann akivoq.
Naalakkersuisunngortoq nutaaq tulluusimaaqisorlu, suliassanik nutaanik aallartitsinissani qilanaaraa.
- Soorunami Naalakkersuisunut ilaasortanngornera nunannaarutigaara suleqataarusussuseqarlungalu. Inatsisartuni ilaasortaanera politikkikkullu allatigut sulinikka nukittoqutigaakka.
Suliassallu suut pingaartinnerullugit aallartinneqarnissaat Siverth K. Heilmannip ima oqaatigai.
- Illoqarfinnut allanut nunaqarfinnullu sanaartugassanik siammaanerunissaq salliullugu sulissutigissavara. Tamannalu pissaaq Naalakkersuisoqatigiit siunniullugu aallaavigisimasaat tunaartaralugu.
Taakkuinnaanngillalli suliassatut qilanaarisai.
- Sanaartugassat aningaasaliiffigineqarsimasut uninngatinneqaannartullu aallartisarneqarnissaat missisoriarlugit suliassama ilagissavaat. Tassami isumaqarama tamakku eqqumaffigineqarluartariaqartuusut aamma aallartikkasuarneqarnissaat pisariaqarsorigakku taamaaliorniarpunga. Kisianni sanaartugassat uninngatiinnarneqarnerannut suut pissutaasimanersut paaseqqaarlugu sulinera aallartissavara, Ineqarnermut Naalakkersuisoq, Siverth K. Heilmann, Atassut taama oqarpoq.
