Naalakkersuisunngortut: Ataqatigiinneq, namminersorneq, naligiinneq
Naalakkersuisoqatigiit partiit pingaasuusut Kuupik Kleist Namminersornermi naalakkersuisut siulittaasuattut qinerpaat. Kuupik Kleist inatsisartuni qinersinermi qinerneqarnerpaalluni 5.461-init qinerneqartoq naalakkersuisut siulittaasussaatut tasissutigineqarmat Siumumi ilaasortat kisimik taaseqataanngillat.
Inatsisartut siulitaasortaavat Josef Motzfeldt, siulittaasussamut qinigassanngortimmat, inatsisartuni ilaasortanit tamanit qinerneqarpoq.
Taamaalilluni inatsisartuni siulersuisut naalakkersuisullu sulilernissaat uppernarsarneqarpoq. Naalakkersuisut siulittaasortaavat Kuupik Klest, atorfimminut ivertinneqarnermi kingorna oqalugiarnermini Ataqatigiinneq Naamminersorneq Naligiinnerlu qulequtarivai, inuit tamarmik ataatsimooqatigiiffinnut peqataanissaminnik taakkununngalu tuniussaqarluarnissaminnik kissaateqarnerat oqaatigalugu.
Taamaakkaluartoq aningaasasiornikkut imaananngitsunik aqqusaagassaqartoq Kuupik Kleistip qularutiginagu oqaatigaa Naalakkersuissunngortussat unammilligassaqartut oqarluni. Aningaasarsiornikkut pissutsit imaannaangitsut nalerpiaanni nunatsinni naalakkersuinikkut nikittoqarpoq.
Aamma piffissami massakkorpiaq inuuniarnikkut atukkat oqinnerulernissaannik piumasaqarnerup sakkortuseruttornerani naalakkersuisunut nutaanut piumasaqaatit annertoorujussuusut tamanit arajutsisimaneqanngilaq.
Taamaammat aningaasartuuteqarnikkut aqutsineq sukangasooq, sipaarniarsinnaassuseqarneq, isertitaqarfiusinnaasunut nutaanut tappissuseqarnissaq minnerunngitsumillu naalakkersuinikkut pingaarnersiuilluni tulleriiaarisinnaassuseqarneq piffissami aggersumi sakkortuumik piumasaqaataassaaq, pilersaarutillu isumaqatigiissutaareersut maleqqissaarniarlugit ingerlatsiniarnissaq pisariaqarluinnassaaq.
Naalakkersuisut siulittaasuat Kuupik Kleist oqalugiarnermini erseqqissarpaa inatsisartuni qinersinermi inernerit ataqqinneqaqqullugit, aamma qanorluunniit assigiinngitsigaluarutta inimi maani matukkut ikuuna iserutta tassaavugut inuiannit qinikkat naligiillutik inuiaqatigiinnik kiffartuussisussatitaasut aamma suleqatigiittussaatitaasut, nammineerluni iluanaarnissaq nammineerlunilu salliuniarnissarluunniit pinnagit inuiaqatigiinnulli pitsaanerpaaq anguniarlugu suliakkerneqarsimasut.
Qanorluunniit amerlatigisunik qanorluunniit ikitsigusunik qinersiseqaraluarutta tamatta inimi uani naligiittut immitsinnut isigissaagut, naligilllutalu suleqatigiissaagut, Naalakkersuisut siulittaasuat Kuupik Kleist taamatut oqarpoq.
Inatsisartut ataatsimiinnerat ataasinngorpat nanginneqassaaq, ataatsimiinnermi tassani inatsisartut ataatsimiititaliaanni assigiinngitsuni ilaasortat akuersissutigineqassallutik.
