Naalakkersuisunik inatsisinik unioqqutitsineraaneq eqqunngilaq

Ineqarnermut Naalakkersusoq Jens B. Frederiksen taama oqarpoq.

Suliassaq tamanut saqqummiuteqqaarnagu inissianik pisinermikkut, suliariumannittussarsionissamut inatsisinik unioqqutinnerarlugu, Sulisitsisut peqatigiffiata NUSUKA-p Naalakkersuisut ullup qeqqata siorna pasillerpai:

- Isumaqarpunga oqaasii sakkortoorujussuusut, tassami unioqqutitsisutut taavaatigut, soorunami tamanna tunngavissaqanngilaq, Jens B. Frederiksen oqarpoq.

Nunaqavissut Sulisitsisut Kattuffiata siulittaasuata, Gerth B. Lyngep oqaatigaa, inissiat 84-it Permagreenip sanaartulereerai, isumaqatigiissut 2009 naalersoq atsiorneqartoq.

Kisianni inatsisinik unioqqutitsineraaneq Jens B. Frederiksenip ilumuunnginnerarpaa. Namminersorlutik Oqartussat suliariumannittussarsiornermut inatsit unioqqutinnagu sanaartukkanik allatulli pisillutillu tunisaqarsinnaasut:

- Inatsisit taamanikkut atuuttut aamma inatsisit januaarip aallaqqaataata kingorna atuutsilersut naapertorlugit arlaannaannilluunniit unioqqutitsisoqanngilaq. Pisitinnata tamanna misissortinnikuuarput advokatinut, taava ersarissumik oqaatigineqarpoq unioqqutitsisoqanngitsoq. Aamma aningaasaqarnermut ataatsimiititaliamit suliarineqarpoq, paasissutissallu tassani takuneqareerput, matumani niuernerup Nunatta karsianut qanoq iluaqutaatiginera ilanngullugu, Jens B. Frederiksen oqarpoq.

NUSUKA-lli tamanna naammaginngilaa. Gerth B. Lynge ima oqarpoq:

- Uagut isumaqarpugut tamanna kukkunerusoq. Una allaavoq inissianik namminneq atugassaminnik soorlu atorfilittaminnut pisiniarpata. Unali allaavoq inissianik 84-inik pisineq, matumani kukkunngikkuma 100 millionit koruunit sinnerlugit nalillit eqqartorpavut. Suliassat taama annertutigisut suliariumanngittussarsiuusseqqaarluni aatsaat suliassiissutigineqarsinnaanerat, Gerth B. Lynge naggasiivoq.