Naalakkersuisut: Nunaqarfinni pingasuni nutaanik pisiniarfiliortoqassanngitsoq

Qaanaap eqqaani Qeqertani Naajaani kiisalu Upernaviup eqqaani Nutaarmiuni innuttaasut naammagittarluarneroqqittariaqarput. Taakku ulluinnarni atortussanik pisiniarfimmi pisinissaq ukiuni tulliuttuni periarfissarissanngilaat.

Inuussutissaqarnermut aatsitassaqarnermullu naalakkersuisup, Jens Frederik Nielsenip Partii Naleqqamit Jens Napaattuumut akissuteqataasaani tamanna allassimavoq.

Naalakkersuisut ulluinnarnilu atortussanik pisiniarfissuup, KNI-p akornanni Nutaarmiuni, Naajaanilu pisiniarfinnik pilersitsisoqarnissaa Qeqertanilu toqqorsiviup kioskinngortinneqarnissaa siunnerfigisamik nalunaarummik atsiugaqaraluarput.

Jens-Frederik Nielsenip akissuteqaammini siunertamut tassunga aningaasaliissutissat arlaleriarluni akuersissutigineqarnissaat misilerarneqartarsimagaluartoq aningaasalli pingaarnersiornissaat pisinnaasimanngitsoq ulloq manna tikillugu paasineqartoq allappaa.

Taassuma sumiiffinni taakkunani pisiniarfinnik kioskimillu pilersitsinikkut inuunerup pitsaassusaata pitsanngorsarneqarnissaa pillugu siunerfigisamik nalunaaruteqarnermi atsioqatigiissuteqartoqarsimasoq erseqqissaatigaa.

Covid-19-illi nunarsuaq tamakkerlugu tuniluunnera pissutigalugu aningaasat annikipput taamaammallu suliniutit eqqarsaatigineqarsimasut qassiiusut kinguartinneqartariaqarlutik.

- Taamaalillutik siunnersuutit aningaasartuutissanik pisariaqartitslsut nutaat pisariaqavissuunngitsut 2021-mi ilanngunneqarsinnaannginnerat Naalakkersuisut tunngavigisatut aalajangiussimavaat, Jens-Frederik Nielsen allappoq.

Taassumalu Inatsisartut Aningaasaqarnermut Akileraartarnermullu Ataatsimiititaliaata 2021-mut aningaasanut inatsimmut siunnersuummut atatillugu ilassutitut aningaasartuutissanut killilersuisoqangaatsiarnissaa nalunaarutigisimagaat innersuussutigalugu.

- Taamaattumik siusinnerpaamik 2022-mut aningaasanut inatsisissamik suliaqarnermut atatillugu suliniummut aningaasanik immikkoortitsisoqarnissaq pillugu qinnuteqartoqarsinnaassaaq, inuussutissaqarnermut naalakkersuisoq allappoq.

Qeqertani inuit 27-t 2020-mi juulip aallaqqaani najugaqarput. Nunaqarfinnilu Nutaamiuni Naajaanilu inuit 48-t najugaqarput.