Naalakkersuisoqatigiit ukiumik ataasinngortorsiorput
Kuupik Kleist naalakkersuisoqataalu ullumikkut ukioq ataaseq qaanngiuppoq juuip ulluisa aqqaneq aappaanni 2009-mi naalakkersuisutut ivertinneqarmata. Naalakkersuisoqatigiit ukioq ataaseq qaangiummat sulilernerannit inatsisit nutaat 85-it atuutsilersinnneqarput, inatsisit arlalippassuit allanngortinneqarput, isumalioqatigiissitat suleqatigiissitallu amerlasuut sulipput, suliniutillu allat aallartinneqarlutik.
Naalakkersuisoqatigiit suleqatigiinnissamut isumaqatigiissutaat najoqqutatut atuuppoq, taannalu naapertorlugu sulinermi angusat suliniutillu ukiup siulliup ingerlareernerani anguneqarput, Naalakkersuisut siulittaasuata allattoqarfianit tusagassiuutinut nalunaarummi taamatut allassimavoq.
Naalakkersuisoqatigiit ukioq ataasinngortorsiornerat pillugu Naalakkersuisut siulittaasuat Kuupik Kleist ima oqarpoq:
- Assoruussuaq ulapiffiusimavoq, suliassarpassuarnik aallussiffiulluni, Kuupik Kleist oqarpoq.
- Misigisimavunga
ukiup ataatsip ingerlanerani ingerlalluarsimalluta aamma suleqatigiilluarsimalluta, Kuupik Kleist oqarpoq.
Meeqqanut tunngassuteqartut taakkununnga ilanngullugit atornerlunneqarsimasut aaqqiiffiginiarneqarnerat taakkua annertunerpaamik siuariarfiusimasut Kuupik Kleistip aamma oqaatigaa.