Naalakkersuisoqatigiit makkunatigut ukiuni tulliuttuni sipaarniarput
Pisortat 80,1 millionit koruuninik aappaagu ukiunilu tulliini pingasuni sipaarfiussasut, aningaasanut aappaagu inatsisissaq pillu isumaqatigiissummi ersippoq.
Sipaarniarnermi Naalakkersuisoqarfiit aqutsisoqarfiillu ilaatigut equgaassapput. Taakkunani allaffissornikkut sipaarniarfiussaaq immikkoortortaqarfinnilu aqutsisut pisortallu ikilisarneqassallutik.
Atorfinnik ikilisaaneq aningaasarsianullu sipaaruteqarneq 11,8 millionit koruuninik sipaarfiussaaq.
Naalakkersuisoqarfiit uku ima sipaarfigineqassapput:
Isumaginninnermut Naalakkersuisoqarfik: 2 millionit koruunit.
Ilinniartitaanermut, Kultureqarnermut Ilageeqarnermut Naalakkersuisoqarfik: 2 millionit koruunit.
Ilinniartitaanermut Aqutsisoqarfik: 6 millionit koruunit.
Atuisunut Unammilleqatigiinnermullu Aqutsisoqarfik: 1,2 millionit koruunit.
Ineqarnermut Attaveqaqatigiinnermullu Naalakkersuisoqarfik: 1,2 millionit koruunit.
Sanaartornermi Oqartussaasut: 1,2 millionit koruunit.
Isinniarnut allaffissornikkut ataatsimoortumillu aningaasartuutit: 1,2 millionit koruunit.
Atorfinnik aaqqissuusseqqinneq 2022-mit 2024-p tungaanut ingerlanneqartussaq katillugit 11 millionit koruuninik sipaarfiussaaq.
Atorfinnik ikilisaanissaq allaffissornikkullu sipaarniarnissaq pillugu aningaaqarnermut naalakkersuisoq Vittus Qujaukitsoq (NQ) itisiliitikkusussimagaluarparput iluatsinngitsumik. Aningaasaqarnermulli inatsisissap isumaqatigiissutiginerata saqqummiunnerani sipaarniarnissaq pillugu ima oqarpoq:
- Naalakkersuisoqarfiit, aqutsisoqarfiit suliffeqarfiillu Namminersorlutik Oqartussat ataaniittut sipaarniuteqarfigineqarput. Sipaarniuteqarnermilu atorfiit ikilisarnissaat taavalu aningaasarsianut tunngatillugu, pisortanut immikkoortortaqarfinnilu pisortanut akissaatit annertuumik sipaarniarfissatut qissiminneqarput, Vittus Qujaukitsoq oqarpoq.
Allaffissornikkut ukiuni sisamani katillugit 14,8 millionit koruunit sipaarneqassapput. Naalakkersuisoqarfiilli aqutsisoqarfiillu suut sipaarfigineqassanersut namminneq aalajangissavaat.
Nukissiorfiit sullissinissaannik isumaqatigiissutit sipaarfiussaaq
Allaffissornikkut sipaarniarnerup saniatigut Nukissiorfiit sullissinerannut isumaqatigiissut ukiuni sisamani tulliuttuni katillugit 28,8 millionit koruuninik sipaarfigineqassapput.
aalisakkanik tunisassiorfiit imermut innaallagissamullu atuinerminnut maanna 41,5 procentinik akiliisarput, sinnera Namminersorlutik Oqartussanit akilerneqartaraaluni.
Sipaarniarnerulli kinguneranik tunisassiorfiit atuinermik 50 procentia akilertalissavaat. Taamaaliornikkut ukiumut 5,7 millionit koruunit nunatta karsianut sipaarutaassapput.
AAMMA ATUARUK Aningaasanut inatsisissatut siunnersuut 180,7 millioninit amigartoorfiusoq
Nukissiorfiit tamatuma saniatigut naammassisaqarfiunerulissapput. Tamanna nunatta karsianut 2024-ip tungaanut 6 millionit koruuninik sipaarutaassaaq.
Uuliasiortunut pilerinarsaaneq aamma eqqugaassasoq
Aamma uuliasiorusussinnaasut nunatsinnut qissimigaarnerunissaannik ilungersuut sipaarfiuvoq. Nunatta uuliasiortunut pilerinarsarnerata unikaallatsinnera nunatta karsianut 15,7 millionit koruuninik sipaarutaassaaq.
Aningaasanut aappaagumut inatsisissaq naalakkersuisoqatigiinnit Siumumit, Demokraatinit Nunattalu Qitornaanit ataasinngornermi novembarip 23-ani atsioqatigiissutigineqarpoq.00:00:40
Aningaasanulli Inatsisartut ataatsimiittarfiani taasissutigineqaqqaassaaq, tamannalu tallimanngorpat novembarip 27-ani pissaaq.