Naalakkersuisoqarfiup amaqqut piniarneqarsinnaanissaat sulissutigigaa
Qaanaarmiut inuttaasut 128-it atsiugaannik APN-imut allakkatigut saaffiginnissuteqartoqarpoq amaqqut iliuuseqarfigineqarnissaat kissaatigineqarluni. Aalisarnermut Piniarnermullu Naalakkersuisoqarfik tusagassiuutinut taama nalunaaruteqarpoq.
- Amaqqut taavani inunnut ulorianarsinnaasutut isigineqarput taamatullu piniakkanut akornusiisinnaasutut isigineqarlutik. Qaanaap aqutsiveqarfiani tuttut umimmaallu amaqqunit sunnerneqartarnerat APN-imut oqaatigineqartarpoq ilaatigullu umimmaat Inglefield Land-imeersut Siorapaluup eqqaanut kujavarternerannut amaqqut peqqutaasorineqarlutik, naalakkersuisoqarfik taama allappoq.
Amaqqut piniarneqarsinnaassasut
Amaqqut pillugit nalunaarutip atuuttup 1988-imeersup allanngortinnissaa naalakkersuisoqarfiup maanna sulissutigileruttorpaa. Taamaaliornermi Qaanaap aqutsiveqarfiani amaqqut piniarneqarsinnaalernissaat siunertarineqarpoq. Nalunaarummut siunnersuutip ukiaq manna tusarniutaanissaa pilersaarutaavoq.
- Amaqqut piniarneqarsinnaalerneratigut inoqarfinnut takkusimaartarunnaassanersut oqaatigereersinnaanngilarput, inunnut ulorianarsinnaasunik piniakkanullu sunniisinnaasunik ajornartorsiutaasunik millisaasinnaasutut isigineqarpoq, Naalakkersuisoqarfik taama allappoq.
