Naalakkersuisoqarfinni pisortat soraartut ataatsimik ilaqqipput
Avatangiisinut Pinngortitamullu Naalakkersuisoqarfimmi pisortaq Søren Stach Nielsen maajip naanerani atuutilersussamik soraarniuteqarsimasoq, Naalakkersuisup siulittaasuata Naalakkersuisoqarfiani pisortap Svend Hardenbergip ippassaq nalunaarutigaa.
Søren Stach Nielsenip soraarniuteqarnerminut atatillugu ilaatigut oqaatigaa soraarniuteqarnissani sivisuumik eqqarsaatersuutigisimagaa, nutaamillu misilittagaqarniarnissani aamma eqqarsaatersuutigisimallugu.
Søren Stach Nielsen, taamanikkut Namminersornerullutik Oqartussani maannalu Namminersorlutik Oqartussani ukiorpaaluni atorfeqarnikuuvoq, immikkoortortami pisortatut, piffissamilu kingullermi Naalakkersuisoqarfimmi pisortatut.
Avatangiisinut Pinngortitamullu Naalakkersuisoqarfimmi pisortatut siorna juulimi atorfinippoq, Miiti Lyngep naalakkersuisuunerata nalaani.
Tamassuma siuliani Naalakkersuisut siulittaasuata Naalakkersuisoqarfiani 2012 decembarimit pisortaagallartutut inissisimavoq, Peter Schultzip atorfimminit ingerlaannartumik atuutilersumik tunuarniuteqarneratigut pisortaagallarluni.
Søren Hald Møller, Avatangiisinut Pinngortitamullu Naalakkersuisoqarfimmi pisortaagallartussanngussasoq, Naalakkersuisut siulittaasuata Naalakkersuisoqarfiani pisortap Svend Hardenbergip oqaatigaa.
