Namminersornerullutik Oqartussat Atuagalliutitigut allagarsiipput kalaallisut oqaasilinnik Naalakkersuisoqarfinni pisortassanik arfineq-marlunnik pissarsiorlutik, tamannali akisunerulissasoq Kuupik Kleistip oqaatigaa:
- Allagarsiussap atuareernerani isumaqarpunga Namminersornerullutik Oqartussani ingerlatsineq akisunerulissasoq, tassami oqaatigineqartutuut soraarsitsisoqarnavianngilaq qaavatigulli kalaallisut oqaasilinnik Naalakkersuisoqarfinni pisortassanik atorfinititsisoqarniarpoq, Kuupik Kleist oqarpoq.
Taanna nangilluni nassuiaavoq siunertat pingaarnerutitat ilarpassui suli akineqarsimanngitsut.
- Isumaqarpungattaaq nalornissutaasut qulaajartariaqartullu suli amerlaqisut, oqarpoq.
Kuupik Kleistip aamma erseqqissaatigaa inatsisartuni ilaasortat naalakkersuisunut aqutsisuusussaanerat eqqaamaneqartariaqartoq.
- Inatsisartuni ilaasortat partiillu sukumiisumik ilisimatinneqartarnerat suli amigaatigisorujussuuarput, Inatsisartuni ilaasortaq Kuupik Kleist oqarpoq.