Naalakkersuisoqarfinni pisortassarsiortoqalerpoq

Naalakkersuisoqarfinni pisortassarsiorneq Namminersornerullutik Oqartussat aallartippaat.

AG ullumi saqqummersoq qupperaraanni quppernerit marlukkaat danskisut kalaallisullu allassimasut atorlugit nassuiarneqarpoq pisortassat sunik piginnaasaqassanersut.

Piumasaqaataavoq qinnuteqartup marluinnik oqaaseqartuunissaa, kalaallisut danskisullu, aamma tuluttut ilisimasaqarluarnissaq.

Qinnuteqartoq atorfimmi qaffasissumi inissisimalluni siulersuinermik misilittagaqartuussaaq, aaqqissugaanermilu naalakkersuinikkut ingerlatsineq tunngavigalugu siulersorneqartumi sulinermik misilittagaqartuussalluni. Aamma naalaakkersuisoqarfimmi suliassaqarfiit akisussaaffigineqartut iluani sulianik tamanik imaluunniit taakku ilaannik misilittagaqartuussaaq kiisalu pitsaasumik suleqatigiissinnaassuseqartuussaaq, avammut ammasuussalluni eqaatsumillu pissuseqartuussalluni.

- Hans Enoksenip piumasaqaataa isumaqatiginngikkaanni niaqoq puumik ulillugu siutillu matullugit inuusoqarsimassaaq, kisianneqarporli.

- Pisortanngortussat ilinniakkatigut tunuliaqutaat ajorsimanngippata namminersornerusuni pisortanngortussanut naalakkersuisut oqaatsitigut piumasaqaataat nutaaq nuna tamakkerlusu oqaatsigitigut pikkorissarnernut sukumiisumik aningaasarpassuarnik aningaasaliinermik malitseqartinneqartariaqassaaq, AG allaaserinnippoq, nangillunilu.

- Naalakkersuisut siulittaasuat nammineerluni siuttunngortariaqarpoq takutillugulu nunatta tamarmi iluaqutissaanik oqaatsitigut allanut piumasaqaatigisani naammassisinnaallugit.

Tassani eqqarsaatigineqarpoq Hans Enoksenip tuluttut danskisullu oqaatsinik ilinniartariaqarnera.

Assersuutissaqqittutut taavaat inatsisartut siulittaasuat Jonathan Motzfeldt allanertat oqaasiinik piginnaasaqarnermigut politikkikkut angusaqarsimasoq akilerneqarsinnaanngitsumillu nittarsaassisutut taaneqartoq.