Naalakkersuisoqarfinni pisortaq: Eqqumiippoq

Namminersorlutik Oqartussat allattoqarfianni sapaatimmi ullaassaani tillinniartoqarsimanera peqqutaalluni allaffiit arlallit iserfigeqqusaajunnaarlugit politiinit assersorneqarput.

Aalisarnermut, Piniarnermut, Nunalerinermullu naalakkersuisoqarfik aamma Nalakkersuisut siulittaasuata allaffeqarfia tillinniarfigineqarsimapput.

Tillinniat aalajangersimasumik siunertaqarsimanerat ilimanarsinnaasoq Naalakkersuisoqarfimmi pisortap Peter Schultzip oqaatigaa.

- Tillinniat pissusaat eqqumiitsutut isikkoqarpoq. Allaffippassuit iserfigisimavaat, sikaaviit skuffiillu ammartitserneqarsimapput, kisianni annertunerusumik tigusaqarsimanersut
maannakkorpiaq takusinnaanngilarput aamma naluarput, takusinnaavarpulli annikitsunik tigusisimasut oqarsinnaanngilangali suusut, Peter Schultz oqarpoq.

Pinerluffiusumi misissuisartut Danmarkimiit ullumi tikissapput tillinniarfiusimasorlu misissorlugu, taava misissuineq naammassippat allattoqarfiit aatsaat ammarneqaqqissapput.

- Pappilissat assigiinngitsut natermiipput, allaffik ataaseq matua aserorlugu iserfigineqarsimavoq, Peter Schultz oqarpoq.

Sulisut ullaaq suliartoramik tupassimaqaat.

- Sulisut amerlanerit angerlarput, angerlarsimaffimmininngaanniit sulisinnaasut sulissapput sinneri allanik allaffissarsiuuppagut. Neriuppugut aqagu pingasunngorpalluunniit allaffitsinnut utersinnaassalluta, Peter Schultz oqarpoq.

Sunik tillittoqarsimanersoq tillinniallu kikkuunerinik suli pasitsaassaqartoqanngitsoq Peter Schultzip ilanngullugu oqaatigaa.