Naalakkersuisoq utaqqineqarpoq

Qimmit qimuttut sussuteqanngitsut aallaallugit naalliutsillugilluunniit toqunneqartarnerat qimmiutillit iliuuseqarfigeqqulerpaat.

- Kalaallit Nunaanni Qimussertartut Kattuffiata nersutillu nakorsaasa suleqatigiillutik nunatta iluani pisartut iliuuseqarfiginissaat sulissutigisariaqarpaat, taama oqarpoq qimmiminik annaasaqartarnerminik qatsussisoq, Sakarias Siegstad, Kangaatsiami najugalik.

Sakarias Siegstad Sisimiuneersutulli Hanseeraq Olsenitulli isumaqarpoq, qimuttoqarfinni pisartut eqqumaffigineqartariaqalersut.

- Qimmiutillit qimminut taamaaliorneq ajorput, allanuku taamaaliortartut, Hanseeraq Olsen ippassigami radioaviisimut oqarpoq.

Kalaallit Nunaanni Qimussertartut Kattuffianni siulittaasoq Mikkel Jeremiassen, Nuugaatsiami Uummannap pigisaani najugaqartoq oqarpoq, qimuttut allanit toqunneqartarnerat aatsaat tusalinngikkini.

- Nutaarsiassaanngilaq uagutsinnut. Pingaartumik Qeqertarsuup tunuani qeqertaqarfiusuni qimmiutillit qimminik qeqertaniititaminnik annaasaqartarnerat ajornartorsiutitoqaavoq. Mikkel Jeremiassen oqarpoq.

- Iliuuseqarnissatsinnut Inuussutissarsiutinut Naalakkersuisoq Siverth K. Heilmann utaqqivarput, ukiormi neriorsuivoq qaammarsaanerit aallartissasut, Qimussertartut Kattuffianni siulittaasoq oqarpoq.