Naalakkersuisoq iliuusissaaleqivoq

Ark'alo Abelsenip pissutsit pitsanngoriarnissaat neriorsuutigisinnaanagu, 17,5 mio. koruunillu aningaasaleeqqilerneq aningaasanut ataatsimiititaliamut qinnutigineqartariaqassasut oqarpoq:

-Siullermik oqaatigissuara erseqqissumik; napparsimavissuaq soorunami matuneqarunnanngilaq, taanna tamatta nalunngeqqissaassavarput. Aappassaa aningaasatigut ajornartorsiorneq ukialaannguaq tutsiuteqqaarmat tassani aallartippugut qanoruna ajornartorsiortigisoq napparsimavissuaq. Taava suliakkiissupput malillugu suliassat aallartipput. Sipaarniuteqarnikkut assigiinngitsutigut aningaasaliissutaasimasut ukiumut naammassinnaasut nalilerneqarpoq, sapaatillu akunnerani kingullermi oqarput missingersuutit atukkallu oqimaaqatigiisinneqassasut, taakkulu aningaasat ukiup sinneranut naammassasut. Taavali nalunaarfigiteriasaarpugut sapaatip akunnerata tulliani 15 mio. koruunit missaannik amigartoornissaq ilimanarsisoq, Ark'alo Abelsen oqarpoq.

Aperaarput sooq siusinnerusukkullu ajornartorsiutit qanoq iliuuseqarfigisimannginnerai, ima akivoq:

-Oqartoqarsinnaanngilaq qanoq iliuuseqanngitsugut. Nakorsanik peqqissaasunillu sulisussarsiorneq naalakkersuisoqarfitta pisinnaasannguani tamaat malillugu ingerlanniarneqartuarpoq. Taartaasartut nakorsat peqqissaasullu akisoorujorujussuit allatut ajornartumik atortariaqartarsimavagut. Uagut nunatsinninngaanniit sapinngisarput tamaat qanoq iliuuseqaraluarpugut, Arkalo Abelsen nassuiaavoq.

Aperaarputtaaq innuttaasut, peqqissaasut nakorsallu ernumaqisut qanoq neriorsorsinnaanerai, ima akivoq:

-Tassa aajuna nersiorsuutigisinnaasatuara, sapinngisannguarput malillugu ukiup sinneranut oorit pisariaqartinneqartut tunngavilersorluarlugit, allatut ajornartumik qinnutigisariaqassavagut naalakkersuisutigoortumik aammalu aningaasaqarnermut ataatsimiititaliamut. Taavalu suliarput ilungersorluta ingerlattuassagipput, aqqutaasinnaasunnguit tamaasa atorlugit pissarsiniarluta, Ark'alo Abelsen taama neriorsuivoq.

Naggataagullu aperaarput pissutsit pitsanngoriartussanersut imaluunniit ajorsiartuinnassanersut, ima akivoq:

- Tassa taanna nalunartua, kialluunniit taanna akisinnaanngilaa, peqqissutsimu naalakkersuisoq Arkalo Abelsen apersorneqarnermini taama oqarpoq.