Naalakkersuisooqatigiit kinguleruttut ataatsimeeqatigiipput

Ippassaq unnukkut naalakkersuisooqatigiit suleqatigiinnerat isasoorpoq.

Ullorpaaluit raajanut nalunaarut nutaaq nutaanngitsorlu assortuussutaareersullu naalakkersuisooqatigiit pingasuusut akornanni silaannaq nillerteriataarpoq.

Oqaatsit sianigisaqanngissusermik nipillit, inatsisaatsuuneraanerit, tatiginassusermillu apeqqusersuinerit atorneqartarlutik. Ippassarlu nal. 18.00 qaangilaaraa naalakkersuisut siulittaasuata, Hans Enoksen.-ip inatsisartut oqaluttarfianiit nalunaarutigaa, Inuit Ataqatigiit naalakkersuisooqataanerminniit anisitaasut.

Naalakkersuisooqatigiilu marluinnanngortut Arsarnernik taagortut tassalu, Siumut aamma Atassut nalunaarput suleqatigiinnertik ingerlatiinnarniarlugu. Naalakkersuisooqatigiit ippassaq nalunaaraluarput, naalakkersuisussat nutaat nalunaaqutaq qulinut ullumi saqqummiunneqassasut, inatsisartunili allattoqarfik nalunaarpoq, Inatsisartuni ataatsimminneq naalakkersuisunnngortussanillu saqqummiussinissaq nal. qulinut aallartittussaagaluartoq, ataatsimiittoqarnera pissutaalluni, nalunaaqutaq ataatsimut kinguartinneqartoq.

Tassani IA-mi naalakkersuisuusimasut issiavii marluk; tassalu Josef Motzfeldt, aningaasaqarnermut nunanullu allanut tunngassuteqartunut naalakkersuisuusimasoq aammalu Agathe Fontain, peqqinnissaqarnermut naalakersuisuusimasup naalakkersuisuuffigisaat kikkunnit tiguneqassanersut tamanut nalunaarutigineqarsinnaajumaartut.

Siumut Atassullu suli amerlanerussuteqaqqalaarput, taassalu ataatsimik amerlanerussuteqaramik.