Siumut Kristian Jeremiassenip oqaasii IA-p tunuliaqutsissappagit naalakkersuisooqataaginnarsinnaanerluni suli aalajanginngilaq.Assi: KNR

Naalakkersuisooqatigiit aaqqiagiinngitsut

IA-meersup Kristian Jeremiassenip inissianik isaterineq taamaatereersoq aallarteqqinneqassasoraa, Siumullu tamatumunnga pisuutillugu. Siumup nalakkersuisuniiginnassanerluni isumaliutigaa.

Qasigiannguani inissianik isaterineq nangilertoq, Inuit Ataqatigiinneersoq, Kristian Jeremiassen, aningaasanut inatsisissap tallimanngormat suliarineqarnerani aalassassimaarluni oqarpoq.

- Ajoraluartumik Siumut naalakkersuisoqatigilerparput, malugalugu ajoraluartumik, Inuit Ataqatiginneersoq, Kristian Jeremiassen Inatsisartut aningaasanut aappaagumut inatsisissaq tallimanngornermi aappassaaneermassuk oqarpoq.

Naalakkersuisoqataasalu Siumukkut taamak oqartoqarnera aalassassimaarutigeqaat.

- Soorunami. Oqariartuut taama imaannaanngitsigisoq, kiinarlu taamak isikkulik takuneqarsinnaavoq qanoq pissuseqartoqarnersoq, partiip siulittaasua, Erik Jensen, KNR-mut oqarpoq.

Qasigiannguani inissianik isaterineq

Kristian Jeremiassenip, sanaartornermut ataatsimiititaliami siulittaasuusup, taama oqarnini Naalakkersuisut Qasigiannguani inissianik aappaagu isaterinissaannik paasinnissimanini tunngavilersuutigaa. Tamannali Siumup siulittaasuata, aamma ineqarnermut naalakkersuisuusup ilumuunnginnerarpaa.

Qasigiannguani inissianik siornaakkunni isaterisoqarnerani aningaasaliissutit sinneruttut sulianut allanut atorneqarnissaat tassani pineqartut, isatereqqinnissarli pineqanngitsoq taanna oqarpoq.

- Imaannaanngitsorujussuuvoq, aamma tunngavissaqarni eqqunngitsumik aallaaveqarluni qisuariarneq takusinnaagatsigu pisussaaffigaarput partiitut taamatut pissusilersorneq akuerisinnaanngilluinnagarput qisuariarfigissallugu, Erik Jensen oqarpoq.

S: IA qanoq isumarpa?

Taamaattumik Siumukkut naalakkersuisoqatimik avammut ersarissaanissaat piumasaraat. Inuit Ataqatigiillu ukiakkut ataatsimiinnerup, sapaatit akunnerata tulliani naammassisussap piariinnginneranni ilaasortamik oqaaseqarnera pillugu ersarissumik isummeqquaat.

- Tunuliaqutaqarpa? Tunuliaqutaqanngila? Taanna paaserusupparput, Erik Jensen oqarpoq.

Naalakkersuisooqatigiinneq nalilersorniaraat

Kristian Jeremiassenillu oqaasii partiiata tunuliaqutsissappagit Siumut naalakkersuisooqataaginnarsinnaanerluni suli aalajanginngilaq.

- Oqaaseqarfigisinnaanngilara. Inernilersuereernissaq isumaqarpunga pissusissamisuunngitsoq. Eqqartorlissuk. Nalilersorlissuk. Taava tassanngaanniit tigujumaarpagut, Erik Jensen oqarpoq.

KNR-p Inuit Ataqatigiit Siumup piumasaqataa pillugu attaveqarfigigaluarpaa. Partiilli sapaatit akunnata siulianni pisoq suli oqaluuserisimanngimmagu tassanngaanniit oqaaseqarumanngillat.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl