Naalakkersuisooqatigiilersussat inissipput

Tamanna ullumi ullup-qeqqata missaani isumaqatigiissutigineqarpoq, tassa Atassut aalajangereersorlu Demokraatit naalakkersuisooqatigiumanagit.

Atassutip isumaqatigiinniarnerni peqataajunnaarnera artornarsimanersoq Naalakkersuisut siulittaasussaannut, Kuupik Kleistimut apeqqutigaarput:

- Soorunalimi uggornarpoq taamatut aalajangertoqartoqarsimanera, kisianni tassa allatut ajornartumik taamaalisimavoq.

Sooq avissaarsimanersut aperigatsinni Kuupik Kleist ima akivoq:

- Ajoraluartumik tamanna massakkut oqaatigisinnaanngikkallarpara, kisianni qularutiginngilara ulluni aggersuni eqqartorneqarumaassasoq.

Suleqatigiinnissaminnut isumaqatigiinnissaminnut sumut killinnersut aamma aperaarput, akivorlu:

- Naalakkersuinikkut isumaqatigiissutissatsinni aaqqissugassat, allanngortitassat allaqqissaagassallu massakkut ingerlanneqarput, aamma naalakkersuisoqarfinnut tunngatillugu naalakkersuisoqarfiit ataasiakkaat qanoq isikkoqarnissaat, akisussaaffinnillu sunik imaqartinneqarnissaat massakkut oqaluuseraavut.

Naalakkersuisooqatigiilernissartik avammut qaqugu tusarliunniarneraat paasiniarparput, ajornakusuulaarnerarpaa tamanna qaqugu nalunaarutigeqassanersoq, ulluliinissaq imaluunniit nalunaaquttamik taasaqarnissaq, neriuutiginerarpaali pinngitsoornatik aqaguagu naammassisimanissartik. Kikkut sumi naalakkersuisuuffeqassanersut Kuupik Kleistip oqaatigisinnaannginnerarpaa. Ilaqutariinnermut Peqqinnissamullu naalakkersuisoqarfiit immikkoortinneqassasut aalajangiusimaneqartoq, Kuupik Kleist aamma oqarpoq.